ఆత్మగౌరవ యాత్రలో ఆటవిడుపు

Posted: 09/11/2013 02:23 PM IST

ఈ రోజు ఆరవరోజు తెలుగుజాతి ఆత్మగౌరవ యాత్రలో కృష్ణా జిల్లాలో పర్యటిస్తున్న తెలుగుదేశం పార్టీ అధ్యక్షుడు చంద్రబాబు నాయుడు తిరువూరు మండలంలో ప్రసంగిస్తూ, కాంగ్రెస్ పార్టీ ఏకపక్ష వైఖరిని ఎండగట్టారు.  రాహుల్ గాంధీని మొద్దబ్బాయని, జగన్ ని దొంగబ్బాయని సంబోధించిన చంద్రబాబు నాయుడు సోనియా గాంధీ, విజయమ్మలు వాళ్ళబ్బాయలకు పట్టం గడదామని చూస్తున్నారని చెప్తూ, భారత ప్రధాన మంత్రి మన్మోహన్ సింగ్ బలహీనత గురించి న్యూయార్క్ టైమ్స్ కూడా ప్రచురించిందని అన్నారు.  దానివలనే ప్రజలంతా నిత్య జీవనంలో ఇబ్బందులను ఎదుర్కుంటున్నారని, కేవలం తెలుగుదేశం పార్టీ మాత్రమే వ్యవసాయం, గ్రామీణ ప్రాంతాలను కూడా అభివృద్ధి పరచగలదని చెప్పుకొచ్చారు. 

నిన్న తిరువూరులో మాట్లాడుతూ, రానున్న ఎన్నికల్లో ప్రజలు కాంగ్రెస్ పార్టీ, వైయస్ ఆర్ కాంగ్రెస్ పార్టీ, తెరాసలను ప్రజలు నామరూపాలు లేకుండా చేస్తారనే ఆశాభావాన్ని వ్యక్తపరుస్తూ, మంచివాళ్ళనే గెలిపించండి, సుపరిపాలనకోసం జస్టిస్ చౌధరిలా మారండి, ఒకవేళ మీరు వైయస్ఆరం సిపి కి ఓట్లు వేస్తే అవి తల్లి కాంగ్రెస్ గూటికే చేరుతుంది కనుక ఆ ఓట్లను అమ్ముకోవటమే అవుతుందని జోస్యం చెప్పారు. 

రాష్ట్రంలో దిక్కు తెలియని పరిస్థితిలో ఉన్న కాంగ్రెస్ పార్టీ తెలంగాణాలో తెరాసను అడ్డుపెట్టుకుని, సీమాంధ్రలో వైయస్ఆర్ సిపి అడ్డుపెట్టుకుని రాష్ట్రాన్ని ఏలుబడిలోకి తెచ్చుకోవాలనుకుంటోంది.  ఆ రెండు పార్టీలూ సోనియా స్క్రిప్ట్ నే చదువుతున్నారు.  వసూళ్ళ పార్టీ తెరాసకి, దొంగల పార్టీ వైయస్ఆర్ సిపి కి తెలుగువాడి దెబ్బ రుచి చూపించి దిమ్మదిరిగేలా చెయ్యాలని చంద్రబాబు పిలుపునిచ్చారు. 

వైయస్ అప్పట్లో ప్రధానికి కప్పం కట్టి వస్తుండేవారని, ఆయన లేకపోవటం అందుకే ఇప్పుడాయనకి బాధాకరంగా ఉందని, అదే మాట ఆయన విజయమ్మతో చెప్పారని అన్నారు చంద్రబాబు. 

గుంటూరు జిల్లాతో మొదలుపెట్టి కృష్ణా జిల్లాతో కలిపి మొత్తం 11 రోజుల యాత్ర చేసిన చంద్రబాబు ఈ రోజు నుంచి ఐదు రోజులపాటు బస్సు యాత్రలో విరామం తీసుకోబోతున్నారు. 

-శ్రీజ