హైద్రాబాద్ లో తెలంగాణా సద్భావన సభ

Posted: 09/10/2013 01:38 PM IST

తెలంగాణా రాజకీయ జెఏసి, తెలంగాణా రాష్ట్రసమితి పార్టీల మధ్య కెకె నివాసంలో చర్చలు ముగిసిన తర్వాత తెరాస అధ్యక్షుడు కెసిఆర్ మాట్లాడుతూ, తెలంగాణా ఉద్యమం లక్ష్యాలను చేరుకుంటున్నదని అన్నారు.  హైద్రాబాద్ లో మేధావులు, ఐకాసలతో కలిసి భారీ ఎత్తున సభను నిర్వహించదలచుకున్నట్లుగా కెసిఆర్ మీడియాకు తెలియజేసారు. 

ఎపి ఎన్జీవోల సభ గురించి వ్యాఖ్యానిస్తూ అదేమంత గొప్ప సభ కాదని కెసిఆర్ తేలిగ్గా కొట్టేసారు.  ఏదో సభ పెట్టి గొప్ప సాధించేసామని, దానితో విభజన ఆగిపోతుందని పగటి కలలు కంటే వాళ్ళిష్టం కానీ ఇలాంటి సభలు తెలంగాణాలో ఎన్నో జరిగాయని, కరీం నగర్ లో జరిగిన మహాసభకు వచ్చిన అతిథుల డ్రైవర్లంత మంది కూడా ఎపిఎన్జీవో సభకు రాలేదని కెసిఆర్ ఎద్దేవా చేసారు. 

దానికి దీటుగా ఎన్టీఆర్ స్టేడియంలో ఘనంగా సభను నిర్వహించదలచుకున్నామని, ఆ కార్యక్రమానికోపేరు, సమయాలను నిర్ణయించటం జరుగుతుందని అన్నారు.  అయితే ఆ తర్వాత తెలంగాణా రాజకీయ ఐకాస ఆ కార్యక్రమానికి సద్భావన సభ అని పేరు పెట్టారు, 22 న నిర్వహిస్తామని తెలియజేసారు. 

తెలంగాణా ప్రజలు 1956 లో ఆంధ్రా తో కలవకముందున్నట్లుగా 10 జిల్లాలతో హైద్రాబాద్ తో కూడిన తెలంగాణా కోరుకుంటున్నారని, తనిప్పటికి ఎన్నోసార్లు ఒక లక్షసార్లు తుట్లు తిన్నానని, తెలంగాణా కోసం మరో లక్ష తిట్లు తినటానికైనా తయారుగా ఉన్నానని కెసిఆర్ అన్నారు. 

ఈరోజు 3.30 గంటలకు తెలంగాణా ఐకాస నాయకుల భేటీలో 12 వ తేదీన నిర్వహించే ఐకాశ విస్తృత స్థాయి సమావేశాల సమావేశం, 22 న హైద్రాబాద్ లో నిర్వహించే సదస్సుల విషయంలో పూర్తి ప్రణాళికను చర్చించుకుంటారు. 

-శ్రీజ