మంది పిల్లలను బొందబెట్టిన నేత..

Posted: 08/24/2013 09:31 AM IST

తెలంగాణ రాష్ట్ర సాధనపై టీఆర్‌ఎస్‌ నేతలకు నిజంగా చిత్తశుద్ధి ఉంటే సీమాంధ్ర వాసుల భయాందోళనలను తొలగించే చర్యలను తీసుకోవాలి కానీ.. రెచ్చగొట్టి సీమాంధ్రలో ఉద్యమం రగల్చడం సరి కాదని తెలుగుదేశం పార్టీ తీవ్రంగా ధ్వజమెత్తింది. రాష్ట్ర విభజన ప్రక్రియ మొదలవుతుందంటే ఆ పార్టీ నేతలకు వసూళ్లు ఆగిపోతాయని వెన్నులో చలిపుడుతోందని తెలుగుదేశం అధికార ప్రతినిధి రేవంత్‌ రెడ్డి విరుచుకుపడ్డారు. ఆయన ఎన్టీఆర్‌ భవన్‌లో ఏర్పాటు చేసిన సమావేశంలో మాట్లాడుతూ కీలకమైన ప్రస్తుత సమయంలో ఫామ్‌హౌజ్‌లో కాకుండా పార్లమెంట్‌లో తన వాణిని కేసీఆర్‌ విన్పించాలని సూచించారు. ఢిల్లీ వెళ్లి ప్రధానమంత్రి స్థాయి వ్యక్తులపై ఒత్తిడి పెంచాల్సిన ఆయన ఫామ్‌హౌజ్‌లో ఏం చేస్తున్నారో చెప్పాలని నిలదీశారు. మంది పిల్లలను బొందబెట్టి సొంత పిల్లలకు అందలాలు కట్టబెట్టడమే ఆయన లక్ష్యమన్నా రు. టీఆర్‌ఎస్‌ స్థాపన రోజు నేను మా ముసలామె మాత్రమే ఉన్నాం. నా పిల్లలు అమెరికాలో కొలువులు చేసుకుంటున్నారు. నాకు కుటుంబ స్వార్థం లేదని కేసీఆర్‌ చేసిన ప్రకటనను గుర్తు చేశారు. విద్యార్థి ఉద్యమకారులు చీమల్లా కష్టించి ఉద్యమ పుట్టలు నిర్మిస్తే వాటిలోకి కేసీఆర్‌ సంతానం, అల్లుడు పాముల్లా దూరారని ఎద్దేవా చేశారు. జై ఆంధ్రా ఉద్యమ కాలంలో ఎన్టీఆర్‌ ప్రాంతాలుగా విడిపోయి మనుష్యులు గా కలిసి ఉందా మన్నారు. ప్రస్తుతం చంద్రబాబు నాయు డు సైతం అదే మాటంటున్నారు. కానీ కేసీఆర్‌ 610జీవోపై నిండు అసెంబ్లిలో ఏం మాట్లాడారో తెలుసా అని కేటీఆర్‌ను ప్రశ్నించారు. చిత్తశుద్ధి ఉంటే సీమాంధ్ర ప్రాంత వాసుల భయాందోళనలు తీర్చడం.. వారి హక్కులను పరిరక్షించే దిశలో ఉద్యమించాలని హితవు చెప్పా రు. నీరు, విద్యుత్‌, నీళ్లపై విస్పష్టంగా వైఖరి ప్రకటించాలని చెప్పారు. నిర్బాధ్యతతో వ్యవహరిస్తోన్న కేసీఆర్‌కు పాలమూరులో ఊరు లేదు. పార్లమెంట్లో నోరూ లేదని దెప్పి పొడిచారు. తమ నేత హరికృష్ణ రాజీనామా ఉదంతంపై స్పందిస్తూ ఆయన అసలే ఆవేశపరుడు. ఆపై కేసీఆర్‌ లాంటి వ్యక్తుల రెచ్చగొట్టే ప్రకటనలతో ఆవేదన చెందారు. అందుకే రాజీనామా చేశారన్నారు.