ప్రత్యేక తెలంగాణ వద్దేవద్దు

Posted: 07/21/2013 09:35 AM IST

ఆలిండియా మజ్లీస్ ఎ ఇత్తెహదుల్ ముస్లీమీన్ (AIMIM) తెలంగాణా రాష్ట్రాన్ని వ్యతిరేకిస్తున్నామని చెప్తోంది.  రాష్ట్రాన్ని ముక్కలు చెయ్యటాన్ని మేము సమర్థించమంటూ ఆ పార్టీ లోక్ సభ సభ్యుడు అసదుద్దీన్ ఒవైసి ప్రకటన చేసారు.  ఈ విషయంలో ఎటువంటి సందిగ్ధాలూ లేవని స్పష్టం కూడా చేసారాయన.  హైద్రాబాద్ ని ఉమ్మడి రాజధానిగా చెయ్యటం, లేక కేంద్రపాలిత నగరంగా ప్రకటించటం లాంటి మాటలు వినిపిస్తున్న సందర్భంలో వాటిని కూడా సమర్ధించబోమని అసదుద్దీన్ ఒవైసీ అన్నారు. 

తమ పార్టీ మొదటినుంచి సమైక్యరాష్ట్రానికే మద్దతునిచ్చిందని, ఇప్పుడేదో రాజకీయ ఫలాలకోసం రాష్ట్రాన్ని విభజించటానికి చూస్తే కాంగ్రెస్ కి అందులో మద్దతునిచ్చేది లేదని ఒవైసీ అన్నారు.  రాష్ట్రంలో ప్రత్యేక తెలంగాణా నినాదంతో ముందుకొస్తున్న భారతీయ జనతా పార్టీ ప్రయత్నాలను అడ్డుకోవటం కోసమే కాంగ్రెస్ ఇప్పుడు తనంతట తాను తెలంగాణా రాష్ట్రాన్ని ఇస్తున్నట్టుగా చూపించే ప్రయత్నం చేస్తోందని, తెలంగాణా వస్తే భాజపా పుంజుకోవటం మాత్రం ఖాయమని, తమ పార్టీ కాంగ్రెస్ కి మద్దతునివ్వటం కాదు అసలు ఆ పార్టీ అధికారంలోకి వచ్చే ప్రశ్నే లేదన్నారాయన.

ఇలాంటి రాజకీయ ఎత్తుగడలకంటే కాంగ్రెస్ పార్టీ ప్రజల సంక్షేమం మీద దృష్టి పెట్టి రాష్ట్రంలో మతసామరస్యానికి పాటుపడితే మంచిదని అసదుద్దీన్ సూచించారు. 

హైద్రాబాద్ నగరం తెలంగాణా జిల్లాలతో చుట్టుముట్టి ఉంది కాబట్టి ఉమ్మడి రాజధాని అనేది కూడా సరైన ఆలోచన కాదని, సీమాంధ్రులు హైద్రాబాద్ లోకి అడుగుపెట్టాలంటే తెలంగాణా జిల్లాల మీదుగా రావలసివుంటుందని అసదుద్దీన్ ఒవైసి తన అభిప్రాయాన్ని తెలియజేసారు.

-శ్రీజ