జగన్, కిరణ్ లను సస్పెండ్ చేయించిన నిత్యామీనన్

Posted: 07/19/2013 03:26 PM IST

ఎయిర్ ఇండియా పైలట్ లు ఇద్దరు నిత్యా మీనన్ వలన సస్పెండ్ అయ్యారు.  వాళ్ళిద్దరూ జగన్ ఎమ్ రెడ్డి, ఎస్.కిరణ్ లు.  అమెరికాలో విమాన దాడి తర్వాత నిజానికి విమానంలోని కాక్ పిట్ లోకి ప్రయాణీకులను అనుమతించరాదన్న నియమాన్ని విధించారు.  నిత్యా మీనన్ లాంటి అందాల భరిణైనా సరే ఆ నియమానికి మినహాయింపు కాదు. 

కానీ బెంగళూరు-హైద్రాబాద్ విమాన ప్రయాణంలో నిత్యామీనన్ కాక్ పిట్ లో కూర్చుని పైలట్ లకు సరదాగా కబుర్లు చెప్పిందట.  ఆ కబుర్లు విన్నందుకు, ఆమెనలా వాళ్ళతో కూర్చోనిచ్చినందుకు వారిద్దరినీ సస్పెండ్ చేస్తూ ఈ ఘటన మీద విచారణ సాగిస్తున్నారు ఎయిర్ ఇండియా అధికారులు. 

ఆరోజు అదే విమానంలో ప్రయాణం చేసిన ప్రయాణీకుల సాక్ష్యాలను విచారిస్తున్నారు.   డైరెక్టరేట్ జనరల్ ఆఫ్ ది సివిల్ ఏవియేషన్ ఈ విషయాన్ని చాలా సీరియస్ గా తీసుకుంటోంది.  ఇలాంటి సంఘటనలు మరి కొన్ని కూడా వారి దృష్టికి రావటంతో అందుకు శిక్షలు చాలా కఠినంగా ఉండాలని తీర్మానం చేస్తున్నారు.

పని నుండి దృష్టి మరలించి విధులను సరిగ్గా చెయ్యనీయని నిత్యామీనన్ లాంటి మెరుపుతీగలే కాదు.  ఎవరినైనా కాక్ పిట్ లోకి ప్రవేశించనీయటం వైమానిక భద్రతా దృష్ట్యా నేరం కనుక అధికారులు ఈ విషయంలో మిగతావారికి కూడా బుద్ధి వచ్చేట్టుగా కఠిన శిక్షలకు సిఫారసు చెయ్యాలని అనుకుంటున్నట్టుగా సమాచారం. 

-శ్రీజ