గోల్కొండ కోటలో బోనాలు వేడుకలు

Posted: 07/15/2013 10:58 AM IST

నిన్న ఆదివారం గోల్కొండ కోటలో బోనాలు మహోత్సవాన్ని వేలాది మంది భక్తులు అంగరంగ వైభవంగా జరుపుకున్నారు.  హైద్రాబాద్ సికిందరాబాద్ లలో నెలంతా సాగే బోనాలు పండుగ జంట నగరాల్లో 1813 నుంచి వస్తోంది.  బోనాలు పండుగను ఆషాడమాసంలో జంట నగరాలతో పాటు కొన్ని తెలంగాణా రాయలసీమ ప్రాంతాలలో కూడా చేసుకుంటారు. 

ఈ పండుగలో అన్ని వయసులవారూ ఉత్సాహంగా పాల్గొనటం విశేషం.  మైసమ్మ, పోచమ్మ, నూకాలమ్మ, పెద్దమ్మ, పోలేరమ్మ, ఎల్లమ్మ, మారెమ్మ మొదలైన దేవతలకు బోనాలు సమర్పించి వేడుక చేసుకోవటమే ఈ పండుగలో పాటిస్తూ వస్తున్న ఆచారం.

బోనాలు అనేది భోజనాలకు వికృతి.  కుండల్లో పాలతోను, పంచదార తోనూ కొన్ని చోట్ల ఉల్లిపాయలు వేసి అన్నాన్ని ఉడికించి అమ్మవారికి నైవేద్యం చేస్తారు.  ఈ వేడుకలో కొత్త బట్టలు వేసుకుని, కొందరు ఔత్సాహికులు రకరకాల వేషధారణతో నృత్యాలు చేస్తూ వస్తారు.  కొందరు ఇళ్ళల్లో చేసుకుంటే మరి కొందరు ఆయా దేవతల గుడిలోనే వంటవార్పులు చేసి అందరూ ఆరగించటం కూడా చేస్తుంటారు.  అందులో మాంసాహారం కూడా ఉంటుంది.  కొన్ని కుటుంబాల్లో మగవాళ్ళు, ఆడవాళ్ళు కూడా కల్లు సేవిస్తారు.

1813లో మొదలైనప్పుడు ఈ వేడుక అమ్మవారికి మహామారి నుంచి కాపాడినందుకు కృతజ్ఞతగా నైవేద్యం పెట్టటం చేసారు.  బోనాలు లోని పదార్థాలు శరీరానికి చలువ చేసేవి ఉంటాయి.  శరీరం మీద వేడి వలన వచ్చే పొక్కులను అమ్మవారు వచ్చింది అని అనటం పరిపాటి.  మశూచికం వంటి వ్యాధులు వచ్చినప్పుడు దాన్ని అమ్మవారి ఆగ్రహంగా పరిగణించేవారు.

వేసవిలోని వేడి తర్వాత ఒక్కసారే వర్షం పడ్డప్పుడు శరీరం లేని వేడి ఒక్కసారిగా బయటకు వచ్చినప్పుడు చర్మం మీద వివిధ రకాల పొక్కుల రూపంలో బయటపడే అవకాశం ఉంది కాబట్టి చలువ చేసే పదార్థాలు తినటం అవసరమన్న అభిప్రాయంతో ఈ ఆచారాన్ని ప్రారంభించివుంటారని పెద్దలు అంటారు.  అయితే భక్తిలోంచి పరివర్తన చెంది అది వేడుకగా మారేటప్పటికి ఆయా ప్రాంతాలలో ఉండే ఆచారాల ప్రకారం వేడుకలలో ఆయా అంశాలు చోటుచేసుకున్నాయి. 

కారణమేదైతేనేం, పండుగ అంటేనే ఆనందం, ఆహ్లాదంతో పాటు అందరితో కలిసి గడపటం కాబట్టి ఏ పండుగకైనా పరమార్ధం అదే.

-శ్రీజ