సీబీఐ జేడీని సాగనంపారు

Posted: 06/07/2013 07:10 PM IST

అక్రమార్కుల గుండెల్లో రైళ్ళు పరిగెత్తించిన సీబీఐ జేడీ లక్ష్మీనారాయణ బదిలీ గత కొన్ని రోజులుగా నుండి సస్పెన్స్ గా ఉన్న విషయం తెలిసిందే. ఎట్టకేలకు ఈయన బదిలీ పై నేడు ఆ సస్పెన్స్ వీడింది. ఈయన ను మహారాష్ట్ర కేడర్ కు బదిలీ కేస్తూ ఢిల్లీ సీబీఐ జాయింట్ డైరెక్టర్ కార్యాలయం నుండి ఉత్తర్వులు వచ్చాయి. ఈ మేరకు ఆయన ఈనెల 11వ తేదీన ఇక్కడి బాధ్యతల నుండి తప్పుకొని తన సొంత రాష్ట్రానికి వెళ్లిపోనున్నారు. ఈయన  డిప్యుటేషన్ పదవి కాలం ఏడేళ్ళు పూర్తి కావడంతో తప్పనిసరి పరిస్థితులలో బదిలీ చేయాల్సి వచ్చిందని అంటున్నారు. గతంలో ఈయన పదవి కాలాన్ని రెండు సార్లు పొడగించారు. ఈయన స్థానంలో చెన్నై సిబిఐ జాయింట్ డైరెక్టర్ అరుణాచలానికి బాధ్యతలు అప్పగించాలని లక్ష్మినారాయణకు ఆదేశాలు అందాయి.

ఆంధ్ర ప్రదేశ్‌లో లక్షల కోట్ల కుంభకోణానికి సంబంధించిన జగన్ కేసును లోతుగా దర్యాప్తు చేస్తున్న లక్ష్మీ నారాయణ అటు కర్నాటకకు చెందిన గాలి జనార్దన్ రెడ్డి కేసు ఓబులాపురం మైనింగ్ కేసు ద్వారా పేరొందారు. ప్రస్తుతం ఈయన ఈ రెండు కేసులను దర్యాప్తు చేస్తున్నారు. ఓబుళాపురం మైనింగ్ కేసుతో పాటు ఎమ్మార్ ప్రాపర్టీస్, వైయస్ జగన్ ఆస్తుల కేసుల దర్యాప్తు ఆయన నేతృత్వంలో జరిగింది. సత్యం కుంభకోణం కేసు దర్యాప్తునకు కూడా ఆయనే నేతృత్వం వహించారు. ఈకేసులలో ఈయన పలు విమర్శలు కూడా ఎదుర్కొని, మంచి ఆఫీసర్ గా పేరొందారు. జగన్ కేసుకు సంబంధించి మరో ఆరు ఛార్జిషీట్లు ధాఖలు చేయనున్న నేపథ్యంలో ఈయన బదిలీని మరికొన్నాళ్ళు పొడగించాలని ఆయన కోర్టును అభ్యర్థించుకున్నారు.