ఆలయంలో బయటపడ్డ నిధి

Posted: 06/02/2013 04:59 PM IST

పంచారామ క్షేత్రమైన పాలకొల్లు క్షీరలింగేశ్వరస్వామి ధ్వజస్తంభం కింద పురాతనమైన బంగారు, వెండి, రాగి నాణేలతో కూడిన నిధులు లభించాయి. 

పడిపోయిన స్థానంలో మరో ధ్వజస్తంభాన్ని ప్రతిష్ఠించటానికి చేస్తున్న పనులలో సామాన్యంగా ధ్వజస్తంభం కింద పెట్టే మంత్రబద్ధమైన యంత్రంతో పాటు నిధులు కూడా లభించాయి.  పోయిన సంవత్సరం ధ్వజస్తంభం కూలిపోవటాన్ని అరిష్టానికి చిహ్నంగా భావించారు.  కానీ వాటి కింద పొందుపరచిన నిధులు బయటపడే సమయం వచ్చిందన్నమాట.

ఇప్పుడున్న బ్యాంక్ వ్యవస్థలు, కట్టుదిట్టమైన హుండీ నియంత్రణలు లేని కారణంగా ఆలయానికి వచ్చిన ఆదాయాన్ని ఆ విధంగా నిక్షిప్తం చేసివుంటారని పెద్దలు భావిస్తున్నారు.  నిధి విలువను లెక్కిస్తున్న పురావస్తు అధికారులు ఆ పని పూర్తయిన తర్వాత వివరాలను వెల్లడిస్తామని అన్నారు. 

ఆలయాన్ని బట్టి వివిధ రకాల యంత్రాలను ధ్వజస్తంభం కింద పెట్టి ఆ తర్వాత మంత్రబద్దంగా ప్రతిష్ట చేస్తారు.  క్షీరలింగేశ్వర స్వామి ధ్వజస్తంభం కింద కూర్మ యంత్రం కనిపించింది. 

కానీ ఈ వార్త నిధి నిక్షేపాల కోసం ఆలయాలలో దొంగతనంగా తవ్వకాలను సాగించేవారికి మరోసారి ఆశ కల్పించే అవకాశం ఉంది కాబట్టి పురాతన ఆలయాల పరిరక్షణను పటిష్టం చెయ్యాలని పెద్దలు అభిప్రాయపడుతున్నారు. 

-శ్రీజ