బంగారం తాకట్టు పెట్టి బంగారం కొనుగోలు

Posted: 04/21/2013 05:35 PM IST

Gold loans and bank withdrawals increased in gold rush

ఏది మంచిదో దాన్నే బంగారం అంటారు. ఏది ఎక్కువ ప్రయోజనకారో దాన్ని బంగారం అంటారు. ఎక్కువ ఇష్టపడేదాన్ని బంగారం అంటారు. మంచి మనిషిని, ఇష్టపడే మనిషిని బంగారం అంటారు. లోహాలక్షణాలలో అంతకంటే ఎక్కువ మంచి గుణాలున్న టైటానియమ్ కంటే బంగారానికే ఎక్కువ మోజు చూపించటానికి కారణం దాని పచ్చటి రంగు మిలమిలకు మనం అలవాటు పడటం.

అటువంటి బంగారం ధర పడిపోవటంతో లాభసాటి పెట్టుబడిగా తీసుకుని తమ డబ్బుని బంగారంలోకి మార్చుకోవటానికి ఎక్కువమంది ఇష్టపడుతున్నారు- పడిపోవటమంటే అత్యధికంగా పెరిగిన రేటుకంటే కొద్దిగా పడిపోవటం! బ్యాంకుల్లో ఫిక్స్ డ్ డిపోజిట్లలో ఉన్న సొమ్ముని కూడా తీసి బంగారం కొనుగోలుకి ఉపయోగించటానికి సిద్ధపడుతున్నారు. ఫిక్స్ డ్ డిపాజిట్ లోంచి మధ్యలో తీసేస్తే నష్టం 1 శాతమే కానీ బంగారు కొనుగోలు చేస్తే ముందు ముందు ఇంకా పెరిగే అవకాశం ఉంది కాబట్టి ఇదో మంచి లాభసాటి, తక్కవ సమయంలో ఎక్కువ ప్రయోజనం కలిగించే పెట్టుబడి అవుతుందని చాలామంది నమ్ముతున్నారు, బ్యాంకులకు పరిగెడుతున్నారు.

దీనంతటికీ కారణం కొన్ని నెలల క్రితం 10 గ్రాముల 22 కారట్ల బంగారం 31000 రూపాయలకు చేరుకుని ఒక్కసారిగా 25500 కి దిగింది. ఇంకా తగ్గుతుందేమో చూద్దామనుకునేవాళ్ళు తక్కువే ఉన్నారు. ఎలాగూ పెరుగుతుంది కాబట్టి ఇప్పుడే కొనుగోలు చెయ్యటమే మంచిదనుకునేవారే ఎక్కవ మంది కనపడుతున్నారు. కొంత మంది ఉన్న పాత బంగారాన్ని బ్యాంక్ లో తాకట్టు పెట్టి మరీ కొత్త బంగారాన్ని కొనుగోలు చెయ్యటానికి ఉత్సాహాన్ని చూపిస్తున్నారు. దీనితో బ్యాంక్ ల్లో చెల్లింపులు కౌంటర్ బిజీగా పనిచెయ్యటం మొదలుపెట్టింది. 9 నుంచి 12 శాతం వరకు వడ్డీ మీద ఇచ్చే బంగారం మీద ఋణాలు, వ్యవసాయం ద్వార వచ్చిన సొమ్మని ఋజువులు చూపిస్తే 7.5 శాతమే వడ్డీ వేస్తారు. అందువలన, అంతకంటే ఎక్కువ లాభమే పొందవచ్చన్న ఉద్దేశ్యంతో బంగారం తాకట్టు పెట్టి బంగారం కొనేవారి సంఖ్యకూడా ఎక్కవైంది.

అయితే బ్యాంకులకుండే లెక్కలు బ్యాంకులకుంటాయి. అంతకుముందు 10 గ్రాములకు 22000 వరకు అప్పు ఇచ్చే బ్యాంకులు ఇప్పుడు 18000 మాత్రమే ఇవ్వటానికి సిద్ధపడుతున్నాయి. జాగ్రత్తగా మార్కెట్ రేట్ లో 65 శాతం మాత్రమే బంగారం మీద ఋణాలు ఇవ్వమని ప్రభుత్వ బ్యాంక్ శాఖలకు వారి ప్రధాన కార్యాలయాలనుండి ఆదేశాలు వెళ్ళాయి. కానీ ప్రైవేటు బ్యాంక్ లు మాత్రం 90 శాతం ఇస్తామని ఇప్పటికీ అంటున్నాయి.

బంగారం రేటు పడిపోవటం స్టాక్ మార్కెట్ మీద కూడా ప్రభావం చూపిస్తుందని విశేషకులు అభిప్రాయపడుతున్నారు.

-శ్రీజ