Posted: 03/02/2013 12:43 PM IST

పాకిస్తాన్ నుండి పారిపోయిన  మాజీ అధ్యక్షుడు ..మళ్లీ పాక్ గడ్డపై అడుగు పెట్టడానికి విశ్వప్రయత్నం  చేస్తున్నారు.  తాను స్వయంగా విధించుకున్న ప్రవాస జీవితానికి స్వస్తి చెప్పి, తాత్కాలిక ప్రభుత్వం ఏర్పాటయ్యాక వారం రోజుల్లోగా పాక్‌కు తిరిగి వెళ్లనున్నట్లు పాక్ మాజీ అధ్యక్షుడు, సైనిక పాలకుడు పర్వేజ్ ముషారఫ్ ప్రకటించారు. తాను ఇస్లామాబాద్, కరాచీ, లేదా రావల్పిండి విమానాశ్రయాల్లో ఎక్కడో ఒక చోట దిగుతానని, తనపై కోర్టుల్లో ఉన్న కేసులను ఎదుర్కొంటానని కూడా ఆయన అన్నారు. తన హృదయం పాక్‌కు తిరిగి వెళ్లాలని తహతహలాడుతోందని ఆయన చెప్పారు. ‘నేను శత్రువులను సృష్టించుకోవడం కోసం పాక్ వెళ్లడం లేదు. ఇది సమన్వయానికి సమయం. నేను పాకిస్తాన్‌ను ప్రేమిస్తున్నాను కనుక స్వదేశానికి తిరిగి వస్తున్నానని పాక్‌ను ప్రేమించే అందరికీ చెప్పదలిచాను’ అని చెప్పారు. మత ఉగ్రవాదం పాక్‌ను అంతర్గతంగా నాశనం చేస్తోందని, మతం పేరుతో కొంతమంది దేశాన్ని నాశనం చేస్తున్నారని కూడా ఆయన చెప్పారు. పాక్‌లో త్వరలో జరగబోయే సార్వత్రిక ఎన్నికలకు ముందు ముషారఫ్ పాక్ తిరిగి వస్తారని దాదాపు రెండేళ్లుగా వార్తలు వస్తూనే ఉన్నాయి. స్వయంగా ఆయన కూడా అనేక సందర్భాల్లో ఈ విషయం చెప్పారు. 2008లో పాకిస్తాన్ పీపుల్స్ పార్టీ (పిపిపి) ఎన్నికల్లో విజయం సాధించి సంకీర్ణ ప్రభుత్వాన్ని ఏర్పాటు చేసినప్పటినుంచి ముషారఫ్ పాక్‌కు దూరంగా లండన్, దుబాయిలలో ప్రవాస జీవితం గడుపుతున్నారు. 2006లో అక్బర్ బుక్తి మృతి, 2007లో మాజీ ప్రధాని బేనజీర్ భుట్టో హత్య కేసుకు సంబంధించి ముషారఫ్‌పై పాక్ కోర్టులు రెండు అరెస్టు వారంట్లు కూడా జారీ చేసాయి.