Posted: 02/12/2013 11:49 AM IST

కాంగ్రెస్ అధినాయకత్వం రాష్ట్రంలో కాంగ్రెస్ పార్టీ పదిలంగా ఉండాలంటే తెలంగాణ రాష్ట్రం ఏర్పాటుపై వీలున్నంత త్వరగా ఒక నిర్ణయానికి రావటం ఎంతో మంచిదని కేంద్ర పర్యటకాభివృద్ధి శాఖ మంత్రి చిరంజీవి స్పష్టం చేశారు. చిరంజీవి ఢిల్లీలో మాట్లాడుతూ తెలంగాణపై ఒక నిర్ణయానికి రాలేకపోవటం వలన కాంగ్రెస్ పరిస్థితి అయోమయంగా తయారవుతోందనే ఆందోళన వ్యక్తం చేశారు. రాష్ట్రంలో కాంగ్రెస్ పార్టీ పనైపోయిందంటూ జరుగుతున్న ప్రచారానికి ఇటీవల జరిగిన సహకార ఎన్నికలు తెర దించాయని చిరంజీవి చెప్పారు. సహకార ఎన్నికల్లో మెజారిటీ సీట్లు గెలుచుకోవటం ద్వారా కాంగ్రెస్ తమ సత్తాను చాటిందన్నారు. సగానికిపైగా సహకార సీట్లను సాధించుకోవటం కాంగ్రెస్‌కు శుభపరిణామమని పేర్కొంటూ భవిష్యత్తులో జరుగబోయే సాధారణ ఎన్నికల ఫలితాలు ఎలా ఉండబోతున్నాయనే దానికి ఇది సూచికగా అభిప్రాయపడ్డారు. కాంగ్రెస్, వైఎస్‌ఆర్ కాంగ్రెస్ పార్టీలు ఓట్లు చీల్చుకుంటే తాము విజయం సాధిస్తామంటూ తెలుగుదేశం కంటున్న కలలు ఎప్పటికీ నిజం కావన్నారు. జనం తమవైపు ఉన్నారంటూ వైఎస్‌ఆర్ కాంగ్రెస్ చేస్తున్న ప్రచారంలో కూడా ఎలాంటి నిజం లేదనేది సహకార ఎన్నికల ఫలితాలు స్పష్టం చేశాయని చిరంజీవి విశే్లషించారు. రాష్ట్రంలోని రైతాంగమంతా కాంగ్రెస్ వెనక ఉన్నారనేది సహకార ఎన్నికలు రుజువు చేశాయంటూ సాధారణ ఎన్నికల్లో కూడా ప్రజలు కాంగ్రెస్ పక్షాన నిలబడతారనే ధీమాను వెలిబుచ్చారు.

తిరుపతి అర్బన్ బ్యాంకు ఎన్నికల్లో 12 డైరెక్టర్లకుగాను ఆరింటిని కాంగ్రెస్ గెలుచుకోవటం గురించి ప్రస్తావిస్తూ పార్టీకి ప్రజల మద్దతు యథాతధంగా ఉందనేది రుజువైందన్నారు. కాంగ్రెస్ నాయకులు కలిసి కట్టుగా పనిచేస్తే మంచి ఫలితాలు సాధిస్తామనేందుకు సహకార ఎన్నికలే నిదర్శమన్నారు. కాంగ్రెస్‌కు మద్దతు ఇచ్చినందుకు చిరంజీవి రైతాంగానికి కృతజ్ఞతలు తెలిపారు. సహకార ఎన్నికల్లో పనిచేసిన విధంగానే అసెంబ్లీ ఎన్నికల్లో కాంగ్రెస్ నాయకులు, కార్యకర్తలు పనిచేస్తే ఘన విజయం సాధిస్తామని చిరంజీవి జోస్యం చెప్పారు. యువతను ఉత్సాహపరిచి పార్టీని బలోపేతం చేయాలని పార్టీ ఉపాధ్యక్షుడు రాహుల్ గాంధీ సూచించారని ఆయన వెల్లడించారు. తెలంగాణపై త్వరితగతిన ఒక నిర్ణయం తీసుకోవటం మంచిదని ఈ సందర్భంగా రాహుల్‌తో చెప్పానన్నారు. తెలంగాణ విషయంలో అధినాయకత్వం ఏ నిర్ణయం తీసుకున్నా శిరోధార్యమన్నారు.