Posted: 01/29/2013 12:26 PM IST

ప్రపంచ వింతల్లో ఒకటిగా భాసిల్లుతున్న తాజ్‌మహల్ విశిష్టతను విదేశీ ప్రతినిధులకు వివరించి ఈ చారిత్రాత్మక కట్టడం పట్ల ఉత్తరప్రదేశ్ ముఖ్యమంత్రి అఖిలేష్ యాదవ్ తనకు గల ప్రేమాభిమానాలను చాటుకున్న మరుసటి రోజే ఆయన మంత్రివర్గ సభ్యుడు, రాష్ట్ర శాసనసభా వ్యవహారాలు, పట్టణాభివృద్ధి శాఖ మంత్రి మొహమ్మద్ ఆజమ్ ఖాన్ ఈ అద్భుత నిర్మాణం కూల్చివేత గురించి మాట్లాడి సంచలనం సృష్టించారు. బాబ్రీ మసీదు కూల్చివేత అనంతరం జరిగిన అల్లర్లు తనకు తీవ్ర విచారాన్ని కలిగించాయని, అప్పట్లో విధ్వంసకారులు బాబ్రీ మసీదుకు బదులుగా తాజ్‌మహల్‌ను కూల్చివేయాలని నిర్ణయించుకుని ఉంటే వారికి స్వయంగా తానే నాయకత్వం వహించి ఉండేవాడినని ముజఫర్‌నగర్‌లో జరిగిన ఒక కార్యక్రమంలో ఆజమ్ ఖాన్ పేర్కొన్నారు.

ప్రియసఖి ముంతాజ్ కోసం కోట్లాది రూపాయల ప్రజాధనాన్ని ఖర్చుచేసి తాజ్‌మహల్‌ను నిర్మించే హక్కు మొఘల్ చక్రవర్తి షాజహాన్‌కు లేదని ఆయన అన్నారు. 17వ శతాబ్ధంలో నిర్మించిన అద్భుత కట్టడం తాజ్‌మహల్‌ను ఉత్తరప్రదేశ్ మాజీ ముఖ్యమంత్రి, బిఎస్‌పి అధినేత్రి మాయావతి నిర్మించిన కట్టడాలు, విగ్రహాలతో ఆయన సరిపోల్చారు. ఉత్తరప్రదేశ్ ప్రభుత్వంలోని అత్యంత శక్తిమంతులైన మంత్రుల్లో ఒకరుగా పరిగణించబడుతున్న ఆజమ్ ఖాన్ సమాజ్‌వాదీ పార్టీ అధినేత ములాయం సింగ్ యాదవ్‌కు అత్యంత సన్నిహితుడుగా కొనసాగుతున్నారు.