Posted: 12/31/2012 10:17 AM IST

మాజీ మంత్రి  ప్రత్యేక తెలంగాణ కోసం తన మంత్రి పదవినే  వదిలేసి, ఎమ్మెల్యేగా  మిగిలిపోయారు.  తెలంగాణ వచ్చేవరకు  పోరాటం చేస్తానని  ఆయన అంటున్నారు. అంతేకాకుండా తెలంగాణ కోసం, తెలంగాణ మంత్రులు పదవులు వదిలి ఉద్యమ బాట పడితేనే తెలంగాణ వస్తుందని, కేంద్రం నెల రోజుల్లో తెలంగాణ ఏర్పాటుకు రోడ్ మ్యాప్ ప్రకటించకపోతే తాను ఎమ్మెల్యే పదవితో సహా అన్ని రకాల పార్టీ పదవులను వదిలి తెలంగాణ రాష్ట్ర సాధనే ఏకైక ఎజెండాగా ఉద్యమం సాగిస్తానని మాజీ మంత్రి, నల్లగొండ ఎమ్మెల్యే కోమటిరెడ్డి వెంకట్‌రెడ్డి ప్రకటించారు. ఆయన తన నివాసంలో ఏర్పాటు చేసిన సమావేశంలో మాట్లాడుతూ తనతో పాటు ఆనాడే టి.మంత్రులు పదవులకు రాజీనామాలు చేసి ఉంటే ఇప్పటికే తెలంగాణ వచ్చి ఉండేదన్నారు. తెలంగాణ కోసం తాను వదిలిన మంత్రి పదవిని భిక్షగా పొందిన ఉత్తమ్‌కుమార్‌రెడ్డి, జెఎసి పేరుతో మంత్రి పదవి సాధించిన జానారెడ్డి సోనియాగాంధీ దృష్టిలో తెలంగాణ నాయకులను పదవులకై ప్రాకులాడే వారిగా మిగిల్చారన్నారు. జనవరి 4న టి.కాంగ్రెస్ విస్తృత స్థాయి సమావేశమంటూ, మరోసారి ఢిల్లీ టూర్ అంటూ టి.మంత్రులు కాలం వెళ్లబుచ్చే నాటకాలు వేస్తున్నారని దుయ్యబట్టారు.

నేడు తెలంగాణ మంత్రిగా ఉన్న ఉత్తమ్ తెలంగాణకు అడ్డం పడిన కేంద్ర మంత్రి చిరంజీవిని సిగ్గు, శరం లేకుండా జిల్లాకు ఆహ్వానిస్తున్నారంటూ విమర్శించారు. 1000 మంది తెలంగాణ బిడ్డల ఆత్మహత్యలు మరిచి ఉత్సవాలు జరుపుకుంటున్న టి.మంత్రుల నైజం తెలంగాణకు ద్రోహం చేసేదిగా ఉందన్నారు. నిజంగా వారికి దమ్ముంటే సీమాంధ్ర ప్రభుత్వం నుండి నిమ్స్‌కు 50 కోట్ల నిధులు ఇప్పించాలని సవాల్ విసిరారు. 28న జరిగిన అఖిలపక్షం పనికిమాలిన సమావేశమని, నెల రోజుల్లో కేంద్రం తెలంగాణ ఇస్తుందన్న నమ్మకం తనకు లేదని, ప్యాకేజీలు, కౌన్సిల్ పేరుతో మోసం చేసే అవకాశం కనబడుతుందన్నారు. తెలంగాణను వ్యతిరేకించిన సిపిఎం పార్టీకి వచ్చే ఎన్నికల్లో ఉన్న ఒక్క సీటుకూడా పోతుందన్నారు. వైకాపా తెలంగాణకు అనుకూలమని లేఖ ఇస్తే ఆ పార్టీలో చేరికపై ఆలోచన చేస్తానన్నారు.