Posted: 11/24/2012 06:58 PM IST

సామాజిక కార్యకర్త, అవినీతి ఉద్యమకారుడు అరవింద కేజ్రీవాల్ తమ కొత్త పార్టీకి 'అమ్ ఆద్మీ' పేరు ఖరారు చేసినట్లుగా ప్రకటించారు. అయితే అధికారికంగా సాయంత్రం మీడియా సమావేశంలో వెల్లడించనున్నారు. 350 మంది సభ్యులతో కార్యవర్గం ఏర్పాటు చేసినట్లు తెలిపారు. 25 మంది సభ్యులతో ఆమ్‌ఆద్మీ పార్టీకి కోర్‌కమిటీని ఏర్పాటు చేశారు. తమది ప్రజల పార్టీ అని కేజ్రీవాల్ పేర్కొన్నారు. స్వరాజ్‌ స్థాపనే లక్ష్యంగా సామాన్య ప్రజల అభ్యున్నతే పార్టీ లక్ష్యంగా ఈ సరికొత్త ఉద్యమపార్టీ ఉండబోతోందని కేజ్రీవాల్‌ ఇప్పటికే వెల్లడించారు. కాగా తన మద్దతుదారులతో అరవింద్‌ కేజ్రీవాల్‌ సమావేశమయ్యారు. కేజ్రీవాల్‌ పార్టీలో యోగీందర్‌ యాదవ్‌, ప్రశాంత్‌ భూషణ్‌, శాంతిభూషణ్‌ వంటి ప్రముఖులు కీలక పాత్ర పోషించనున్నారు. నూతన రాజకీయం పక్షం ‘ఆమ్ ఆద్మీ’కి సంబంధించిన వివరాలను  సామాజిక ఉద్యమకారుడు  అరవింద్  కేజ్రీవాల్ వెల్లడించారు. తమకు రాజకీయం తెలియదని  తామందరూ సామాన్య పౌరులమని ఆయన పేర్కొన్నారు.  ఆదివారం సాయంత్రం  పార్టీ సమావేశం  నిర్వహిస్తామన్నారు.  అదే రోజు  జంతర్ మంతర్ దగ్గర జరిగే ధర్నాలో  పాల్గొనేవారందరూ తమ పార్టీ సభ్యులని ఆయన పేర్కొన్నారు.  తమ పార్టీలో  ఎస్సీ, ఎస్టీ, ఓబీసీ, మైనార్టీ,మహిళలు.. అందరికి సముచితస్థానం కల్పిస్తామన్నారు. కొత్త పార్టీకి సంబంధించిన అన్నీ లాంఛనాలు పూర్తయినట్టు ఆయన తెలిపారు.