జ్ఞానవాపి మసీదు కేసులో ట్విస్ట్.. వారణాసి కోర్టు విచారణపై ‘సుప్రీం’ స్టే

Posted: 05/19/2022 12:32 PM IST

వారణాసిలోని జ్ఞానవాపి మసీదు కేసులో కీలక పరిణామం చోటు చేసుకుంది. వారణాసిలోని స్థానిక కోర్టు ఈ కేసును విచారించకుండా దేశ సర్వోన్నత న్యాయస్థానం సుప్రీంకోర్టు గురువారం స్టే విధించింది. ఈ కేసులో శుక్రవారం మధ్యాహ్నం 3 గంటలకు అత్యున్నత న్యాయస్థానం వాదనలు విననున్నట్టు ప్రకటించింది. జ్ఞానవాపి మసీదులో సర్వే చేస్తుండగా వజు ఖానా (ముస్లింలు కాళ్లు, చేతులు శుభ్రం చేసుకునేందుకు ఉద్దేశించిన నీటి గుండం)లో శివలింగం బయటపడడం తెలిసిందే. ఇక ఇవాళ విచారణ చేపట్టనున్న తరుణంలో సర్వోన్నత న్యాయస్థానం అదేశాలతో వారణాసి కోర్టు దానిని నిలిపివేసింది. ఈ నెల 23న విచారణ చేపడతామని తెలిపింది.

కాగా, మసీదులోని వజు ఖానాలో లభించిన శివలింగం రక్షణకు కట్టుదిట్టమైన భద్రత కల్పించాలని.. కేసును విచారిస్తున్న వారణాసీ కోర్టు లోగడ ఆదేశాలు ఇచ్చింది. సుప్రీంకోర్టు సైతం ముస్లింలు తమ ప్రార్థనలు కొనసాగించుకోవచ్చని, అదే సమయంలో వజు ఖానా వద్ద భద్రత కల్పించాలని రెండు రోజుల క్రితం ఆదేశించింది. విచారణ సందర్భంగా ‘‘ఏర్పాట్ల విషయంలో కఠినంగా వ్యవహరించాలని ట్రయల్ కోర్టును ఆదేశిస్తున్నామని కూడా అత్యున్నత న్యాయస్థానం పేర్కోంది. ఈ వ్యాజ్యంలో తదుపరి చర్యలు తీసుకోకుండా నిరోధిస్తున్నామని వెల్లడించింది.

ఈ అంశంపై శుక్రవారం త్రిసభ్య ధర్మాసనం విచారణ నిర్వహిస్తుందని సుప్రీంకోర్టు ధర్మాసనం స్పష్టం చేసింది. ఇదిలావుండగా, వారణాసీ కోర్టు నియమించిన ప్రత్యేక కోర్టు కమీషనర్ విశాల్ సింగ్ ఇదివరకే తన నివేదికను అందజేయగా, అంతకుముందే అడ్వకేట్ కమీషనర్ అజయ్ కుమార్ మిశ్రా తన నివేదికను న్యాయస్థానానికి సమర్పించారు. మరోవైపు కోర్టు ఆదేశాల నేపథ్యంలో జ్ఞానవాపి మసీదు - కాశీ విశ్వనాథ్ టెంపుల్ కాంప్లెక్స్ వద్ద శాంతి భద్రతల సమస్య తలెత్తకుండా సీఆర్పీఎఫ్ బలగాలు రంగంలోకి దిగాయి. వజు ఖానాకు వెళ్లే డోర్ వద్ద జవాన్లు మోహరించారు. సీఆర్పీఎఫ్ కమాండెంట్, డిప్యూటీ ఎస్పీ ర్యాంక్ ఆధ్వర్యంలో రక్షణ ఏర్పాట్లు చేశారు.