బెంగళూరులో తెలుగు మ‌హిళ‌పై క్యాబ్ డ్రైవ‌ర్‌ అఘాయిత్యం

Posted: 09/24/2021 05:32 PM IST

క‌ర్నాట‌క రాజ‌ధాని బెంగుళూరులో ఓ తెలుగు మహిళపై అఘాయిత్యం జరిగింది. అమెను తన స్నేహితురాలి ఇంటి నుంచి అమె ఇంటికి తీసుకెళ్లే క్రమంలో టాక్సీ డ్రైవర్ దారి మళ్లించి నిర్జన ప్రదేశానికి తీసుకెళ్లి అఘాయిత్యానికి పాల్పడ్డాడు. బాధితురాలిపై అఘాయిత్యానికి పాల్పడే ముందుకు ఆమెతో ఆ డ్రైవ‌ర్ త‌న ఫోన్‌లో సెల్ఫీ దిగాడు. ఈ ఘ‌ట‌న ఇవాళ వేకువజామున జీవ‌న్ బీమా న‌గ‌ర్ పోలీసు స్టేష‌న్ ప‌రిధిలో చోటుచేసుకున్న‌ది. అనుకోకుండా నిద్రలోకి జారుకన్న బాధితురాలు.. నిద్ర నుంచి తేరుకుని.. ఘటనాస్థలం నుంచి పరుగుతీసింది.

అయితే పరుగుపెట్టే ముందు అమె క్యాబ్ డ్రైవర్ పోన్ కూడా తీసుకుని వెళ్లి పోలీసులకు అందజేయడంతో క్యాబ్ డ్రైవర్ అమెతో సెల్పీ దిగిన విషయం బయటకు వెళ్లడైంది. ఈ కేసు సంబంధించిన పూర్తి వివ‌రాలు ఇలా ఉన్నాయి. ఏపీకి చెందిన మ‌హిళ త‌న ఫ్రెండ్ ఇంటి నుంచి త‌న ఇంటికి వెళ్లేందుకు తెల్ల‌వారుజామున 3.20 నిమిషాల‌కు క్యాబ్ బుక్ చేసుకున్న‌ది. హెచ్ఎస్ఆర్ లేఅవుట్ నుంచి ఆమె ఆ క్యాబ్‌లో త‌న ఇంటికి 3.40 నిమిషాల‌కు చేరుకున్న‌ది. కానీ ఈ లోపే ఆ మ‌హిళ క్యాబ్‌లోనే నిద్ర‌లోకి జారుకున్న‌ది. అయితే ఆ మ‌హిళ ఇళ్లు స‌మీపించిన త‌ర్వాత‌.. క్యాబ్ డ్రైవ‌ర్ డోర్ తీసేందుకు కారు వెనుక సీటుకు వ‌చ్చి చూశాడు.

ఆ మ‌హిళ నిద్ర‌పోవ‌డాన్ని గ‌మ‌నించిన ఆ డ్రైవ‌ర్‌.. నిర్జ‌న‌ ప్ర‌దేశానికి త‌న కారును తీసుకువెళ్లి ఆమెతో సెల్ఫీ దిగాడు. ఆ త‌ర్వాత అత్యాచారం చేశాడు. నిద్ర మ‌త్తు నుంచి తేరుకున్న ఆ మ‌హిళ .. క్యాబ్ డ్రైవ‌ర్‌ను తోసి వేసి ప‌రుగులు తీసింది. క్యాబ్ డ్రైవ‌ర్ ఫోన్‌ను కూడా ఆ మ‌హిళ ప‌ట్టుకువెళ్లింది. ఆ ఫోన్‌ను ఆమె పోలీసుల‌కు అప్ప‌గించింది. ఈ కేసును విచారిస్తున్నట్లు పోలీసులు తెలిపారు. ప్రాథ‌మిక విచార‌ణ ప్ర‌కారం.. లైంగిక దాడి జ‌రిగిన‌ట్లు తెలుస్తోంది. మెడిక‌ల్ రిపోర్ట్ కోసం పోలీసులు ఎదురుచూస్తున్నారు. లైంగిక దాడికి పాల్ప‌డిన‌ట్లు నిందితుడు పోలీసుల‌కు చెప్పాడు.