‘దిశ’ నిందితుల షాకింగ్ విషయాలు వెలుగులోకి..!

Posted: 12/18/2019 11:32 AM IST

Cyberabad police reveal shocking facts in disha accused case

దేశవ్యాప్తంగా పెను సంచలనం సృష్టించిన దిశ హత్యాచార కేసులోని హత్యాచార నిందితులకు సంబంధించిన మరో సంచలనమైన విషయం వెలుగులోకి వచ్చింది. ఈ వార్తల ఆధారంగానే పోలీసులు వీరిని ఎన్ కౌంటర్ రూపంలో అంతమొందించారా.? అన్న అనుమానాలు కూడా కలుగుతున్నాయి. నిందితులకు సంబంధించిన షాకింగ్ విషయాలు వెలుగులోకి రావడంతో.. ఎన్ కౌంటర్ ఘటన తర్వాత వారి కుటుంబాలకు వచ్చిన సానుభూతిని.. ఈ విషయాలు వెలుగులోకి రావడంతో అవిరైపోయాయి. కేసు విచారణలో ఈ విషయాలను నిందితులు అంగీకరించారని కూడా సమాచారం.

ఇంతకీ ఆ షాకింగ్ విషయాలు ఏంటంటే.. వైద్యురాలు దిశపై అత్యాచారానికి తెగబడడానికి ముందు నిందితులు.. మరో 9 మంది మహిళలపై అత్యాచారం చేసి హత్య చేసినట్టు పోలీసులకు ఇచ్చిన వాంగ్మూలంలో వెల్లడించినట్టు తెలుస్తోంది. కాగా, ఈ కేసులు వెలుగులోకి వచ్చినా.. వారిపై అనుమానాలు రాకపోవడంతోనే.. దిశపై కూడా అదే రీతిలో టోల్ గేటుకు కూతవేటు దూరంలో సామూహిక హత్యాచారానికి తెగబడినట్టు తెలుస్తోంది. దిశ కేసులో ప్రధాన నిందితుడైన అరీఫ్ ఆరుగురిని హత్య చేయగా, చెన్నకేశవులు ముగ్గురిని అంతమొందించినట్టు చెప్పారు.

ఈ ఘటనలన్నీ మహబూబ్‌నగర్‌, సంగారెడ్డి, రంగారెడ్డి, హైదరాబాద్‌, కర్ణాటక ప్రాంతాల్లోని హైవేల సమీపంలో చేసినట్టు నిందితులు అంగీకరించినట్టు తెలుస్తోంది. అత్యాచారం అనంతరం హత్య చేసి మృతదేహాలను దహనం చేసినట్టు నిందితులు తమ వాంగ్మూలంలో వెల్లడించినట్టు సమాచారం. నిందితులు చెప్పిన సమాచారం ఆధారంగా దర్యాప్తు ప్రారంభించిన పోలీసులు ఆయా ప్రాంతాల్లో మొత్తం 15 ఘటనలు జరిగినట్టు గుర్తించారు. దిశ నిందితుల డీఎన్ఏను మృతి చెందిన వారి డీఎన్ఏతో విశ్లేషిస్తున్నారు. నిందితులకు సంబంధించి కోర్టుకు సమర్పించనున్న చార్జిషీట్‌లో వారు వెల్లడించిన నేరాలకు సంబంధించిన వివరాలను కూడా పొందుపర్చనున్నట్టు తెలుస్తోంది.