మూడో అంతస్తు నుంచి పడిన రెండేళ్ల బుడతడు సేఫ్..

Posted: 12/04/2019 11:57 AM IST

అభం శుభం ఎరుగని ఓ రెండేళ్ల బుడతడు.. అడుకుంటూ భవనం మూడో అంతస్థు పైనుంచి పడినా.. ఎలాంటి గాయాలు లేకుండా, ఎంచక్కా కాపాడబడ్డాడు. అయితే ఆ బుడతడిని పట్టుకునే ప్రయత్నంలో ముగ్గురు యువకులకు మాత్రం స్వల్పగాయాలయ్యాయి. అత్యంత భయాందోళన కలిగించే ఈ ఘటన కేంద్రపాలిత ప్రాంతమైన డామన్‌ డయ్యూలో జరిగింది. ఘటన వివరాల్లోకి వెళ్తే.. డామన్ లో మంగళవారం రాత్రి సమయంలో స్థానిక భవనంలోని మూడో అంతస్థు నుంచి రెండేళ్ల బుడ్డోడు అడుకుంటూ బయటకు వచ్చాడు. నిలబడి వున్న బుడతడు ఒక్కసారిగా అదుపు తప్పి.. కిందకు జారిపోయాడు. అయితే ఇది గమనించిన స్థానికులు అప్రమత్తమయ్యారు. భవనం కింద గుమిగూడి బుడ్డోడిని కాపాడేందుకు ప్రయత్నించారు. ఇద్దరు వ్యక్తులు బుడ్డోడిని పట్టుకోడానికి గాలిలోకి చేతులు చాపారు. ఎట్టకేలకు ఓ యువకుడు బుడ్డోడిని క్యాచ్‌ పట్టి కిందపడ్డాడు.

అతనికి చుట్టూ చేరిన మిగిలిన యువకులు కూడా అతను పట్టుకోలేని పక్షంలో బుడతడని పట్టుకునేందుకు చేతులు చాచారు. బాలుడిని పట్టుకునే క్రమంలో ముగ్గురు యువకులు కిందపడ్డారు. దీంతో వీరికి స్వల్పగాయాలయ్యాయి. ఈ వీడియో నెట్టింట్లో వైరల్ గా మారడంతో ప్రశంసలు వెల్లువెత్తుతున్నాయి. కాగా, బుడతడిని పట్టుకునేందుకు యత్నించిన యువకులను నెటిజనులు ప్రశంసలతో ముంచెత్తుతున్నారు. పక్కవాడి కోసం మనకెందుకులే అనుకునే ఈ సమాజంలో బుడ్డోడి ప్రాణాలు కాపాడిన యువకులకు నెటిజన్లు కృతజ్ఞతలు తెలుపుతున్నారు. బాబును రక్షించిన మీరు ఎంతోమంది హృదయాలను గెలుచుకున్నారంటూ ఓ నెటిజన్‌ ఆనందం వ్యక్తం చేశాడు.

#WATCH Daman and Diu: A 2-year-old boy who fell from 3rd floor of a building was saved by locals, yesterday, in Daman. No injuries were reported. pic.twitter.com/bGKyVgNhyM

— ANI (@ANI) December 3, 2019