పోర్న్ స్టార్ తో ట్రంప్ సంబంధం.. డీల్

Posted: 01/13/2018 10:07 AM IST

అమెరికా అధ్యక్షుడు డొనాల్డ్ ట్రంప్ పై మరో సంచలన ఆరోపణ. ఓ పోర్న్ స్టార్ తో ఆయనకు శారీరక సంబంధాలు ఉన్న విషయం వెలుగులోకి వచ్చింది. ఈ విషయాన్ని ఎక్కడా వెల్లడించకుండా ఉండేందుకు సదరు నటికి భారీ మొత్తంలో ట్రంప్ సొమ్ములు ముట్టజెప్పారని వాల్ స్ట్రీట్ జర్నల్ తెలిపింది.

స్టిఫానీ క్లిఫార్డ్ అనే అమెరికా జాతీయురాలు ఓ పోర్న్ స్టార్. 2006లో ఓ గోల్ఫ్ గేమ్ సందర్భంగా ట్రంప్ కు ఆమె పరిచయం అయింది. అదే సమయంలోనే మెలానియాను ట్రంప్ మూడో వివాహం చేసుకున్నారు. అయినప్పటికీ, స్టిఫానీతో ట్రంప్ శారీరక సంబంధం పెట్టుకున్నారు. అధ్యక్ష ఎన్నికల బరిలోకి ట్రంప్ దిగుతున్న సమయంలో, ఈ విషయం గురించి మాట్లాడేందుకు ఆమె ప్రయత్నించింది. దీంతో, విషయం బయటకు పొక్కకుండా చూసేందుకు మైఖెల్ కోహెన్ అనే లాయర్ కు ట్రంప్ బాధ్యతలను అప్పజెప్పారు.

ఈ నేపథ్యంలో, ఆమెకు ఏకంగా లక్షా ముప్పై వేల డాలర్లను ముట్టజెప్పి మ్యాటర్ క్లియర్ చేశారు మైఖేల్. విషయం బయటకు రానివ్వకుండా ఆమె వద్ద నుంచి హామీ కూడా తీసుకున్నారు. ఈ విషయాలను ఇప్పుడు వాల్ స్ట్రీట్ జర్నల్ బయటపెట్టింది. ఈ కథనాలను మైఖేల్ కొట్టిపారేయగా... స్టిఫానీ మాత్రం స్పందించలేదు. వైట్ హౌస్ మాత్రం ఇవన్నీ కట్టు కథనాలంటూ వ్యాఖ్యానించింది.