ఒళ్లు జలదరించే రీతిలో వాటిని చంపారు

Posted: 07/20/2016 05:36 PM IST

ఇటీవల చెన్నై లో ఓ మెడికో సైకోలా ఓ కుక్కను మేడ మీద నుంచి విసిరేయటం దాన్ని వీడియో తీసి సోషల్ మీడియాలో పెట్టడం తీవ్ర విమర్శలకు దారితీసింది. సెలబ్రిటీలు కూడా దుర్మార్గపు చర్యపై తమ ఆగ్రహాన్ని వెల్లగక్కుతూ నిందితుడిని కఠినంగా శిక్షించాలని కోరారు. అయితే అంతకు మించిన దారుణమైన ఘటన హైద‌రాబాద్‌లో ఇప్పుడు చోటు చేసుకుంది.

ముషీరాబాద్ కు చెందిన ఆరుగురు యువకులు మదమెక్కి కుక్క పిల్లలను పైశాచికంగా చంపారు. ఆ అకృత్యాన్ని వీడియో తీసి సోషల్ మీడియాలో అప్ లోడ్ చేశారు. కుక్క పిల్లలను పట్టుకోవడం, తల్లి నుంచి వేరు చేసి కర్రలతో కొట్టడం, మంట వేసి ఆ కుక్క పిల్లలను వేయడం, అవి మంటలను తట్టుకోలేక బయటకు పారిపోతుంటే, పట్టుకొని మరీ అందులో వేయడం, చివరకు అవి సజీవ దహనం కావడం.. ఆ వీడియోలో ఉంది.

ఇక విష‌యాన్ని తెలుసుకున్న సైబ‌ర్‌ పోలీసులు ఈరోజు వారిని అదుపులోకి తీసుకొని, వారిపై కేసు న‌మోదు చేశారు. స‌ర‌దాకు ఈ ప‌నిచేశామ‌ని యువ‌కులు చెబుతుండగా, ఆ నీచపు పనికి సర్వత్రా మండిపడుతున్నారు. జంతు ప్రేమికులను క‌ల‌చివేసిన ఆ వీడియోను నెట్ లోంచి తొలగించారు పోలీసులు.