తెలంగాణలో కలకలం రేపుతున్న రైతు ఆత్మహత్యలు

Posted: 09/26/2015 01:38 PM IST

Telangana farmers suicide controversy kcr sarkar

నూతనంగా ఏర్పడిన తెలంగాణ రాష్ట్రంలో రైతు ఆత్మహత్యలు రోజురోజుకు పెరుగుతూనే వున్నాయే తప్ప ఏమాత్రం ఆగడం లేదు. అటు ప్రభుత్వం రైతులకు తామున్నామంటూ భరోసా కల్పిస్తున్నారే కానీ.. ఆత్మహత్యల్ని మాత్రం అదుపు చేయలేకపోతున్నారు. ప్రతిరోజూ పలువురు రైతులు బలవంతంగా ప్రాణాలు తీసుకుంటున్నారు. ఇప్పుడు తాజాగా మరో ముగ్గురు రైతులు ఆత్మహత్యలు చేసుకోవడంతో తెలంగాణ రాష్ట్రంలో తీవ్ర కలకలం రేగింది.

రంగారెడ్డి జిల్లా పరిగి మండలం రాఘవాపూర్ లో శ్రీశైలం అనే రైతు వున్నాడు. గతకొన్నాళ్ల నుంచి పంట సమస్యలు ఎదుర్కొంటున్న ఈయన.. ప్రభుత్వ సహాయం కోసం వేచి చూశాడు. మరోవైపు అప్పులు ఎక్కువగా పెరిగిపోయాయి. తన కష్టాలకు ఏదో ఒకరోజు పరిష్కార మార్గం దొరుకుతుందని వేచి చూశాడు కానీ.. ఫలితం లేకపోయింది. దీంతో చేసేదమీలేక పురుగుల మందు తాగి ఆత్మహత్య చేసుకున్నాడు. ఇతనిలాగే వరంగల్ జిల్లా కేసముద్రం మండలం అర్పనపల్లిలోని కిష్టాపురం తండాలో వుంటున్న పత్తిరైతు మోహన్.. అప్పుల బాధతో ఆత్మహత్యకు పాల్పడ్డాడు. ఇక పరకాల మండలం, రామకృష్ణాపురంలో రాజేందర్ అనే రైతు కూడా అప్పుల బాధతో ఉరి వేసుకుని చనిపోయాడు. ఈ విధంగా రైతుల ఆత్మహత్యలు తెరమీదకి రావడంతో తెలంగాణ ప్రభుత్వంపై తీవ్రస్థాయిలో విమర్శలు వెల్లువెత్తుతున్నాయి.

తమది రైతుల ప్రభుత్వం అని డప్పు వాయించుకుంటున్న కేసీఆర్ సర్కార్.. రైతులు బలవన్మరణానికి ఎందుకు పాల్పడుతున్నారో వివరణ ఇవ్వాలని కొందరు నిలదీస్తున్నారు. ప్రభుత్వ నిర్లక్ష్య వైఖరి వల్లే అన్నదాతలు బలవన్మరణానికి పాల్పడుతున్నారని ఆరోపణలు చేస్తున్నారు. డబ్బున్న వాళ్లకే కేసీఆర్ సర్కార్ మరింత డబ్బు అందిస్తోందని.. రైతన్నలకు మాత్రం మొండిచెయ్యి చూపుతోందని అంటున్నారు. మరి.. తాజాగా వెలుగులోకొచ్చిన రైతున్న ఆత్మహత్యలపై కేసీఆర్ సర్కార్ ఎలా స్పందిస్తుందో వేచి చూడాల్సిందే!

AS