పవన్ పోరాటం కోసం ఆరాటపడుతున్న శివాజీ

Posted: 04/13/2015 11:48 AM IST

Actor shivaji protest krishna river ap special status pawan kalyan janasena

‘ఏపీ ప్రత్యేక హోదా’ కోసం నటుడు శివాజీ గతకొన్నాళ్ల నుంచి నిరంతర పోరాటం కొనసాగిస్తున్న విషయం తెలిసిందే! ఆంధ్రరాష్ట్రంలో పర్యటిస్తూ ‘ఏపీ స్పెషల్ స్టేటస్’ గురించి అందరికీ అవగాహన కల్పిస్తున్న ఈయన.. ఈ నేపథ్యంలోనే ఈరోజు ఉదయం (13-04-2015) కృష్ణానదిలో దిగి ఈ ప్రత్యేక హోదా కోసం వినూత్న నిరసన చేపట్టారు. ఈ కార్యక్రమంలో భాగంగానే ఆయన జనసేనాధిపతి, పవర్ స్టార్ పవన్ కల్యాణ్ ప్రస్తావన తీసుకొచ్చారు. ప్రస్తుతం ఆంధ్రరాష్ట్ర ప్రజలు, రైతులకోసం ఆయన చేస్తున్న పోరాటం చాలా బాగుందని, అలాగే ముందుకు కొనసాగితే రాష్ట్రానికి ప్రత్యేక హోదాతోపాటు భవిష్యత్ తరానికి ఉపయోగపడే మరిన్ని ప్రణాళికలు వచ్చే అవకాశాలున్నాయన్న ఆశాభావం వ్యక్తం చేశారు.

ఈ నేపథ్యంలోనే శివాజీ మాట్లాడుతూ.. ‘పవన్ కల్యాణ్ ని నేను ఒక మాట అడగదలచుకోవాలనుకుంటున్నా.. అన్నయ్యా! మీరు ఇంతవరకు చేసిన పోరాటం చాలా బ్రహ్మాండంగా వుంది. అందుకు ప్రజలకు మీ పట్ల ఎంతో అభిమానం పెరిగింది. ఇవ్వాళ మీరు రోడ్డు మీదకు వస్తే.. కోట్లాది మంది రోడ్డు మీదకు రావడానికి సిద్ధంగా వున్నారు. మీరు రాజధాని మీద పోరాడారు. ఓకే ఫైన్.. మెజారిటీ ప్రజలను మనం గౌరవించాలి. చిన్నచిన్న సమస్యలుంటే మీరు సర్దగలరు. కానీ.. ఏపీలో మీ-మెగాస్టార్ కుటుంబాన్ని ఈరోజు ఈ స్థాయిలో నిలబెట్టిన ప్రజలకు, భావి అవసరాలు తీరుస్తారని ఆశిస్తున్నాను. అంటే.. రేప్పొద్దున మనం మన పిల్లలకోసం ప్రణాళికలు ఏర్పాటు చేసుకునేలాగే, ఏపీ విద్యార్థులకు కూడా మీ పిల్లల్లాగే భావించి వారి భవిష్యత్ కి సంబంధించి ప్రణాళికలు ఏర్పాటు చేసేలా పోరాటం కొనసాగించాలన్న అభిప్రాయం. ఏపీ ప్రజలకు హెల్ప్ చేయడానికి ఎవరూ లేరు. మీరు పోరాడండి.. మీరు పోరాడితే ఖచ్చితంగా వచ్చి తీరుతుంది. మీ శక్తి అటువంటిది. దాన్ని వాడండి’ అని వ్యాఖ్యానించారు.

ఇక చివరగా తాను ప్రత్యేక హోదా కోసం ప్రాణత్యాగానికైనా సిద్ధమని ఈ సందర్భంగా శివాజీ తెలిపారు. మాట తప్పొద్దని, ఏపీని ముంచొద్దని రాసిన ప్లకార్డులతో ఆయన వినూత్న నిరసన కార్యక్రమం చేపట్టారు. ఏపీకి ప్రత్యేక హోదా కల్పించే విషయంలో కేంద్రమంత్రి వెంకయ్యనాయుడు ప్రత్యేక బాధ్యత తీసుకోవాలని ఆయన డిమాండ్ చేశారు.