వోటెయ్యనివాళ్ళకి వోటు హక్కెందుకసలు?

Posted: 04/21/2014 11:11 AM IST

భారతీయ జనతా పార్టీ సీనియర్ నాయకుడు లాల్ కృష్ణ అద్వానీ మధ్యప్రదేశ్ లో తాండ్లాలో బహిరంగ సభలో మాట్లాడుతూ వోటే వెయ్యనివారికి వోటు హక్కెందుకుండాలని ప్రశ్నించారు. 

వోటు హక్కును వినియోగించుకోనివారి వోటును రద్ధు చెయ్యాలని అద్వానీ ఎన్నికల కమిషన్ కి సిఫారస్ చేసారు.  కొన్ని దేశాలలో వోటు హక్కును వినియోగించుకోనివారికి జరిమానా ఉంటుందని తెలియజేసిన అద్వానీ భారత్ లో జరిమానా వద్దు కానీ కనీసం వారి వోటును రద్దు చెయ్యాలని అభిప్రాయపడ్డారు. 

ప్రతి వోటర్ తనకున్న వోటు హక్కును గుర్తించాలని, దాన్ని ప్రతి ఎన్నికలలోనూ వినియోగించుకోవలసివుంటుందని అద్వానీ అన్నారు.  ఎప్పుడైనా వోటర్ తన వోటు హక్కును వినియోగించుకోని పక్షంలో ఆ వోటర్ ని ఆ తర్వాత వచ్చే ఎన్నికలలో వోటు వెయ్యనివ్వగూడదని ఎన్నికల కమిషన్ కి అద్వానీ సూచించారు. 

అందరూ వోటేస్తేనే వోటర్ల నిజమైన ఉద్దేశ్యమేమిటన్నది ఎన్నికల ద్వారా ప్రకటితమౌతుందన్నది వాస్తవం.  ఎంత శాతం వోట్లు ఎన్నికలలో వినియోగించుకోకుండా మిగిలిపోయినా, ఆ వోటర్ల అభిమతమేమిటన్నది అర్థం కాకుండా పోతుంది.  కాకపోతే నియమం ప్రకారం వోట్లను లెక్కించి ఎవరు గెలిచారన్నది తెలియజేయటం జరుగుతుంది.

-శ్రీజ