సోనియా ఆటకట్టిస్తాం!

Posted: 08/23/2013 08:39 AM IST

తెలుగు ప్రజల గుండెల్లో చిచ్చురేపిన సోనియాగాంధీ ఆటకట్టిస్తాం. విదేశి వనిత అయి నా రాజీవ్‌గాంధీ భార్యగా భారతదేశానికి వచ్చిన సోనియా గాంధీని ఎంతో గౌరవించాం. భారత పౌరసత్వం తీసుకునేందుకు 14 ఏళ్లపాటు నిరాకరించి భారతీయులను, భారతదేశాన్ని అవమానపరిచినా ఎంతో ఓర్పుతో సహించాం. తెలుగు ప్రజలను విడదీయాలని చూస్తే ఊరుకోమని, అవసరం అయితే డిల్లీ ని దిగ్భంధం చేస్తామని సమైఖ్యాంధ్ర జేఏసి తీవ్రంగా హెచ్చరించింది. గత 23 రోజులుగా వివిధ రూపాల్లో ఆందోళనలు నిర్వహిస్తున్న సమైఖ్యవాదులు చేపట్టిన లక్ష గళ ఘోషతో కర్నూలు ప్రతిధ్వనించింది. రాష్ట్రాన్ని సమైఖ్యంగా ఉంచాలంటూ లక్ష గొంతుకలు గళమెత్తాయి. రాయలసీమ ముఖద్వారమైన కర్నూలు జిల్లాలో సమైఖ్యాంద్ర ఉద్యమం శిఖరాగ్రానికి చేరింది. ప్రైవేట్‌ విద్యా సంస్థల యాజమాన్యం, ఉద్యోగ, ఉపాధ్యాయ జేఏసిల సంయుక్త ఆధ్వర్యంలో కర్నూలులో లక్ష గళ ఘోష నిర్వహించారు. నగరంలోని వివిధ ప్రాంతాల నుండి భారీ ఎత్తున ర్యాలీగా వచ్చిన విద్యార్థులు రాజ్‌విహార్‌ సెంటర్‌ లో ఏర్పాటు చేసిన వేదిక వద్దకు చేరారు. సోనియాగాంధీ డౌన్‌డౌన్‌, కాంగ్రెస్‌ డౌన్‌డౌన్‌, మంత్రులు రాజీనామా చేయా లంటూ లక్షగొంతులు గళమెత్తాయి. రాజకీయ జెండా, అజెం డాలతో సంబంధం లేకుండా జేఏసి ఆధ్వర్యంలో నిర్వహించిన లక్ష గళ ఘోషలో రాజకీయ నేతలకు తావివ్వలేదు. జిల్లాలోని అన్ని ప్రాంతాల నుండి పెద్దఎత్తున తరలివచ్చిన విద్యార్థిలోకం కర్నూలు పురవీధుల్లో కదం తొక్కారు. విద్యార్థులకు తోడుగా సామాన్యులు సైతం సమైఖ్య ఉద్యమానికి బాసటగా నిలిచారు. లక్ష మందికి పైగా ఒకే సారి ఉద్యమంలోకి రావడంతో కర్నూలు నగరంలోని ప్రధాన రహదారులు కిక్కిరిసాయి. ఎక్కడిక్కడ ట్రాఫిక్‌ స్థంభించిపోయింది. కాంగ్రెస్‌ పార్టీ ఎమ్మెల్యేలు, మంత్రులు, కేంద్ర మంత్రులు తమ పదవులకు రాజీనామా చేసి ఉద్యమంలోకి కలిసి రావాలని సమైఖ్యవాదులు డిమాండ్‌ చేశారు. పదవులు పట్టుకు వేలాడితే పరిణామాలు తీవ్రంగా ఉంటాయని హెచ్చరించారు.