Posted: 06/16/2012 03:52 PM IST

జూనియర్ మహిళా రెజ్లర్లపై లైంగిక వేధింపుల వివాదం కొత్త మలుపు తిరిగింది. వేధింపుల సంఘటన జరగలేదని, కోచ్‌ల మధ్య ఉన్న వైరమే ఈ వివాదానికి కారణమని స్పోర్ట్స్ అథారిటీ ఆఫ్ ఇండియా (సాయ్) సీనియర్ అధికారి వెల్లడించాడు. ఆరోపణలు చేసిన నలుగురు బాలికల్లో ముగ్గురి సంతకాలు ఫోర్జరీ చేసినవని అతడు తెలిపాడు. గత నెల లక్నోలో జరిగిన క్యాంపులో కోచ్ తమపై వేధింపులకు పాల్పడ్డట్టు ఏ క్రీడాకారిణీ ఫిర్యాదు చేయలేదని తమ విచారణలో తేలిందన్నారు. భవిష్యత్తులో తమకు అవకాశాలు రాకుండా ఉండటానికి ఈ వివాదాన్ని సృష్టించారని ఆ బాలికలు అభిప్రాయపడ్డారని తెలిపాడు. కోచ్‌ల మధ్య అనారోగ్యకరమైన పోటీ ఈ వివాదానికి కేంద్రమని అతడు పేర్కొన్నాడు. విచారణ నివేదిక సమర్పించాల్సి ఉందని, అయితే ఆరోపణలు నిగ్గుతేల్చే సాక్ష్యమేదీ దొరకలేదన్నాడు. కోచ్‌ల మధ్య విరోధమే ఈ వివాదానికి మూల కారణంగా కనిపిస్తోందని అతడు తెలిపాడు. కాగా, లక్నోలో నిర్వహించిన క్యాంపులో ఒక కోచ్ తనపై లైంగిక వేధిపులకు పాల్పడ్డట్టు హర్యానాకు చెందిన జూనియర్ రెజ్లర్ ఫిర్యాదు చేసిందని మీడియాలో వార్తలు వచ్చాయి. క్రీడా మంత్రి అజయ్ మాకెన్‌కు మే 16న ఈ అంశంపై ఆమె ఫిర్యాదు చేసిన సంగతి తెలిసిందే. ఈ ఆరోపణలపై విచారణను నిర్వహించాలని సాయ్‌ను క్రీడాశాఖ ఆదేశించింది. ముగ్గురు సభ్యులతో ఒక విచారణ కమిటీని సాయ్ నియమించింది. కాగా, ఆరోపణలు ఎదుర్కొంటున్న కోచ్‌పై సాయ్ వేటు వేసింది.