Posted: 06/13/2012 11:32 AM IST

లండన్ ఒలింపిక్స్‌లో పసిడి పతకం సాధించిన క్రీడాకారులకు 2 కోట్ల రూపాయల చొప్పున నగదు పురస్కారాలు అందజేయనున్నట్టు పంజాబ్ ఉప ముఖ్యమంత్రి సుఖ్‌బీర్ సింగ్ బాదల్ తెలిపారు. వచ్చే నెల 27వ తేదీ నుంచి ప్రారంభమయ్యే లండన్ ఒలింపిక్స్‌లో పాల్గొనే భారత హాకీ జట్టులో చోటు దక్కించుకున్న పంజాబ్ క్రీడాకారులు గుర్వీందర్ సింగ్ చాందీ, ధరమ్‌వీర్ సింగ్, గుర్బాజ్ సింగ్, మంజీత్ సింగ్, సర్వణ్‌జీత్ సింగ్‌లను సత్కరించేందుకు ఏర్పాటు చేసిన కార్యక్రమంలో బాదల్ ఈ ప్రకటన చేశారు. లండన్ ఒలింపిక్స్‌లో పాల్గొనబోతున్న పంజాబ్ క్రీడాకారులందరికీ ఆయన శుభాకాంక్షలు తెలియజేశారు. పంజాబ్ క్రీడాశాఖ మంత్రిగా కూడా బాధ్యతలు నిర్వర్తిస్తున్న బాదల్ పంజాబ్ హాకీ సంఘానికి అధ్యక్షునిగా కూడా వ్యవహరిస్తున్నారు. హాకీ క్రీడను పంజాబ్ ప్రజలు ఎంతో ఆరాధిస్తారని, అంతర్జాతీయ స్థాయిలో భారత హాకీ జట్టు సాధించిన విజయాల్లో పంజాబ్ క్రీడాకారుల పాత్ర ఎంతో ముఖ్యమైనదని ఆయన ఈ సందర్భంగా పేర్కొన్నారు. లండన్ ఒలింపిక్స్‌కు వెళ్తున్న భారత హాకీ జట్టులో అన్ని రాష్ట్రాల కంటే పంజాబ్ క్రీడాకారులే ఎక్కువగా ఉన్నారని, ఇది తమకెంతో గర్వకారణమని ఆయన అన్నారు. రాష్ట్రంలో క్రీడారంగాన్ని మరింత అభివృద్ధి పరిచేందుకు తమ ప్రభుత్వం కట్టుబడి ఉందని బాదల్ తెలిపారు.