Posted: 05/14/2012 04:02 PM IST

మూడు దశాబ్దాలుగా కమ్యూనిస్టులకు కంచుకోటగా ఉన్న పశ్చిమబెంగాల్ లో తన విజయబావుటా ఎగురవేసి ముఖ్యమంత్రిగా పీఠాన్ని అధిష్టించిన పశ్చిమబెంగాల్ మఖ్యమంత్రి మమతా బెనర్జీ అధికారంలోకి వచ్చి సరిగ్గా ఏడాది అయ్యింది. ఈ సందర్భంగా ఆమె పాదయాత్ర నిర్వహించారు. ఈ పాదయాత్రలో మమతా ఏకంగా పది కిలోమీటర్లు నడిచారు. ఈ పాదయాత్రకు అసంఖ్యాక అభిమానులు వెంట వచ్చారు. అలాగే రైల్వే మంత్రి ముకుల్ రాయ్‌తో కలిసి కోల్‌కతాలో ఆమె పది కిలోమీటర్ల మేర నిరాటంకంగా నడిచారు.

ఈ సందర్భంగా మాట్లాడుతూ ‘వారి హయాంలో యాభైఐదు వేల మంది ప్రాణాలు కోల్పోయారు. మా, మాటీ, మానుష్ నినాదంతో వచ్చి వామపక్షీయులను మట్టికరిపించి బెంగాల్ ప్రజాస్వామ్యాన్ని తిరిగి పాదుకొల్పాను' అని మమత పేర్కొన్నారు. పంచాయతీల్లో మహిళలకు యాభై శాతం రిజర్వేషన్లు కల్పించామన్నారు. మావోయిస్టు ప్రభావిత ప్రాంతమైన జంగల్‌మహల్‌లో శాంతి స్థాపనకు కృషి చేశామన్నారు. ఎన్నికలకు ముందు చెపిన వాగ్దానాలన్నీ దాదాపు వందశాతం పూర్తి చేశామన్నారు.