Posted: 03/20/2012 06:46 PM IST

మధుమేహ వ్యాధిగ్రస్తులకు టాబెట్ల రూపంలో లభించే మందును చక్కెర పూత కలిగిన హోమియో గుళికల తరహాలో ‘మైక్రో క్యాప్యూల్స్’ రూపంలో తయారుచేసి విజయం సాధించాడు తెనాలికి చెందిన కొండూరి రాజేష్. అతను పరిశోధన పత్రాలకు ఆంధ్రా యూనివర్సివటీ ఈనెల 12వ తేదీన రాజేష్‌కు పీహెచ్‌డీ ప్రదానం చేసింది. ఏయూలో బయోటెక్నాలజీ విద్యార్థిగా చేసిన పరిశోధనతో అమెరికాలోని మిసిస్సిప్పి యూనివర్సిటీ గ్రాడ్యుయేట్ స్కూల్ కౌన్సిల్ ఫెలోషిప్, భారత ప్రభుత్వ సామాజిక న్యాయం, సాధికారత మంత్రిత్వశాఖ, యూజీసీ స్కాలర్‌షిప్‌లకు ఎంపికయ్యాడు. 2009లో అమెరికా వెళ్లి యాంటీ డయాబెటిక్ డ్రగ్ ‘పయోగ్లిటజోన్’పై పరిశోధనలు చేశాడు. అమెరికాలో ‘అక్టోస్’ పేరుతో, ఇండియా లో ‘పయోజ్’ పేరుతో మార్కెట్ చేస్తున్న ‘పయోగ్లిటజోన్’, రక్తంలో చక్కెర శాతాన్ని అదుపులో ఉంచేందుకు పనిచేస్తుంది. ‘అక్టోస్’ అమెరికాలో 15, 30 లేదా 45 మిల్లీగ్రాముల బిళ్లల రూపంలో లభిస్తోంది. మేరీలాండ్‌లోని ఎమినెంట్ ఫార్మస్యూటికల్ సర్వీసెస్ సంస్థలో చేసిన పరిశోధనల్లో రాజేష్, ‘పయోగ్లిటజోన్’ మందును నవీకరించి మధుమేహ రోగులకు మరింత ఉపయుక్తంగా చేయగలిగారు. ఈ మందుపై ఎమినెంట్ ఫార్మాస్యూటికల్ సంస్థ పేటెంటుకు దరఖాస్తు చేసినట్టు రాజేష్ వివరించారు.