Posted: 03/01/2012 01:54 PM IST

ఒకప్పుడు కేవలం మాట్లాడుకోవటానికే పనికివచ్చే ఫోన్లు అరచేతుల్లోకి రావటమే కాక అరచేతిలో వైకుంఠ కాదు కానీ సైన్స్ సమాచారమంతా ఇవ్వటానికి రంగం సిద్ధమైంది. సైన్స్@ మొబైల్ అనే ఈ అప్లికేషన్ ద్వారా ఎస్ఎమ్ఎస్ తో సైన్స్ విషయాలను నేరుగా సెల్ ఫోన్ లో పొందవచ్చు.

దేశంలో జనాభాతో పోటీగా పెరిగిపోతున్న సెల్ ఫోన్ల సంఖ్య 100 కోట్లకి చేరుకున్న సందర్భంగా మారు ప్రాంతాలకు, సామాన్యుడికి కూడా అందుబాటులోకి వచ్చిన నేపథ్యంలో ఇక అందరికీ సమాచారం అందివ్వటానికి వ్యాపార సేవల ప్రచారం కోసం ఎస్ఎమ్ఎస్ పద్ధతి ఎప్పుడో వచ్చేసింది. ఇక విఙానం కూడా ఇలాంటి అప్లికేషన్ల వలన రావటం మరింతగా స్వాగతించదగ్గ విషయం.

ఈ ఎస్ఎమ్ఎస్ సేవలో శాస్త్రవేత్తల వివరాలు, ఆరోగ్య సూత్రాలు, పర్యావరణ రక్షణకి సంబంధించిన జాగ్రత్తలు, సైన్స్ కి సంబంధించిన అన్ని విషయాలను తెలియజేయటమే కాకుండా, వార్తలు, ముఖ్యమైన దినాలు, సూక్తులను కూడా వినియోగదారులకు అందిస్తారు. అన్నిటికన్నా ముఖ్యమైనది- వినియోగదారులలో సైన్స్ గురించి అసలు తెలియనివారు, కొద్దిగా ప్రవేశమున్నవారు, ఆ సబ్జెక్టులో ఉన్నవారు ఇలా మూడు స్థాయిల వర్గాలుగా విభజించి వారి కనుగుణమైన వివరాలను అందించబోతున్నారు.

విఙాన్ ప్రసార్, ఇగ్నో సంయుక్తంగా నిర్వహిస్తున్న ఈ కార్యక్రమంలో వినియోగదారులుగా చేరటానికి సులభంగా scimbl అని టైప్ చేసి, 092230516161 కి ఎస్ఎమ్ఎస్ చేస్తే చాలు. అయితే ప్రస్తుతం ఈ సేవ ఇంగ్లీషులోనే ఉపలబ్ధమౌతుంది.

-శ్రీజ