Posted: 02/29/2012 12:15 PM IST

మాజీ ముంబై ప్రదేశ్ కాంగ్రెస్ పార్టీ అధ్యక్షుడు కృపాశంకర్ సింగ్ మీద నిర్మల్ నగర్ పోలీస్ స్టేషన్ లో కేసు నమోదయింది. అక్రమార్జనలతో ఆస్తులను తన పేరుతోనూ బినామీ పేర్లతోనూ సంపాదించారన్న నేరం మీద కృపాశంకర్ మీద అవినీతి నిరోధక చట్టంకింద కేసు నమోదు చెయ్యమని ముంబై నగర పోలీస్ కమిషనర్ కి ముంబై హైకోర్టు ఆదేశించిన వారం రోజులకి ఆ పని నిన్న పూర్తయింది.

కృపాశంకర్ మీద సంజయ్ దీనానాథ్ తివారీ వేసిన ప్రజా ప్రయోజన వ్యాజ్యాన్ని విచారించిన హైకోర్టు పేదరికంలోంచి ఒక్కసారిగా ధనవంతుడిగా మారిన ఉదంతాన్ని పరిశీలించి, ఫ్లాటు, నగదు, బంగారు ఆభరణాలు, భూమి మొదలైన ఆస్తుల వివరాలను చూసి పిటిషనర్ తివారి అభియోగానికి కావలసినంత ఆధారమున్నదని, అందువలన వెంటనే కృపాశంకర్ మీద కేసు నమోదు చేస్తూ, అతని సమీప బంధువుల ఆస్తుల వివరాలను సేకరించవలసిందిగానూ, అతని నేరంలో పాలుపంచుకున్న కృపాశంకర్ భార్య, కోడలిని కూడా వదిలిపెట్టవద్దని కోర్టు ఆదేశించింది.

కుటుంబ సభ్యులు కోట్లల్లో ఒకరికొకరు నగదు రూపంలో బహుమానాలు ఇచ్చిపుచ్చుకోవటాలు, ఎటువంటి హామీలు లేకుండానే బిఎమ్ డబ్ల్యు కార్లను లోన్ లో తీసుకున్నట్టుగా చూపించటం, కోట్లాది రూపాయలు బ్యాంక్ ఖాతాలలోకి వచ్చి పడటానికి ఎటువంటి ఆధారాలు లేకపోవటం, ముంబై నగరంలోను, ఉత్తరప్రదేశ్ లోనూ ఖరీదయిన ప్రాంతాల్లో ఫ్లాట్ లు, కమర్షియల్ కాంప్లెక్స్ లు ఇత్యాది ఆస్తుల వివరాలను పిటిషన్ తో పాటు కళ్ళు చెదిరే స్థాయిలో చూపించారు తివారీ.

-శ్రీజ