Posted: 02/22/2012 12:01 PM IST

ఇద్దరు నావికుల పొరపాటు రెండు దేశాల మధ్య విభేదాలను రేపుతోంది. దౌత్యపరంగా ఎంత సభ్యతను పులుముకుని చర్చలు చేసినా, ఎంతో కొంత కటువు చోటుచేసుకోవటం, అభిప్రాయ భేదాలు కాస్తా చాలాకాలం మర్చిపోలేని ముద్రలను వెయ్యటానికి ఎంతో అవకాశం ఉంది.

కేరళ సముద్ర తీరంలో ఇద్దరు భారతీయ మత్స్యకారుల మీద కాల్పులు జరిపి వారి మృతికి కారణమైనందుకు భారత ప్రభుత్వం వారి మీద ఇక్కడే విచారణ జరిపించాలని చెప్పటమే కాకుండా, ఈ సంఘటనకు ఇరు దేశాల దౌత్యసంబంధాలకూ ఏమీ సంబంధం లేదని స్పష్టం చేసినా, ఎలాగైనా ఆ ఇద్దరినీ చెరనుంచి విడిపించి తీసుకునిపోవాలని ఇటలీ ప్రభుత్వం సర్వ విధాలా ప్రయత్నం చేస్తోంది. దానిగురించి చర్చలు జరిపి భారత్ ని ఒప్పించటానికే ఈ రోజు ఇటలీ ఉప విదేశాంగ మంత్రి ఢిల్లీ వస్తున్నారు. వచ్చే వారం విదేశాంగ మంత్రి వస్తారు.

మరోపక్క కాథలిక్ చర్చ్ ద్వారా కూడా ఒత్తిడి పెంచుతూ, మృతి చెందిన కుటుంబాలకు పరిహారం చెల్లిస్తామని, ఇటలీ పౌరులైన ఆ ఇద్దరు నేరస్తులనూ ఇటలీ తీసుకెళ్ళి అక్కడ విచారణ చేస్తామని ఇటలీ అంటోంది. ఇటలీ చట్టం ప్రకారం ఇటలీ దేశస్తులు ప్రపంచంలో ఎక్కడ నేరం చేసినా వారిమీద ఇటలీ లోనే విచారణ జరగాలని, అందువలన వాళ్ళని తిరిగిచ్చేయమని ఇటలీ వాదన.

కానీ, భారతీయుడి మీద కానీ భారతీయ నౌక మీద కానీ నష్టానికి గురిచేస్తూ నేరం చేస్తే అది ఎక్కడ జరిగినా సరే భారతదేశంలోనే దాని విచారణ జరగాలని ఇండియన్ పీనల్ కోడ్ సెక్షన్ 4 చెప్తోంది. అందువలన, మనవాళ్ళు మన చట్టం ప్రకారమే ఈ కేసులో ముందుకెళ్ళాలని అనుకుంటున్నట్టుగా ఉన్నత స్థాయిలో నిర్ణయాలు జరుగుతున్నట్టుగా విశ్వసనీయ వర్గాల నుంచి వచ్చిన సమాచారం. నేవీ ఓడల కి చెందిన చట్టాలను ఈ వాణిజ్య ఓడకు కూడ వర్తింపజేయాలనుకోవటం ఇటలీ అత్యుత్సాహాన్ని తెలియజేస్తుందన్నారు వాళ్ళు.

మొత్తానికి ఈ వివాదాన్ని ఇటలీ అంత సులభంగా వదిలిపెట్టేట్టుగా లేదు. భారత్ కూడా వెనక్కి తగ్గటం లేదు.

-శ్రీజ