Posted: 01/31/2012 10:13 AM IST

రాజకీయాలను కులాలబారి నుంచి రక్షించాలని లోక్ సత్తా అధినేత జయప్రకాశ్ నారాయణ నిన్న గాంధీ వర్ధంతి సందర్భంగా మాట్లాడుతూ అన్నారు. పాతకాలం వాళ్ళంటే అందులోంచి బయటకు రాలేకపోతున్నారన్న ఉద్దేశ్యంతో కులవివక్షను సమూలంగా నాశనం చెయ్యాలని యువతకు ఆయన పిలుపునిచ్చారు.

కులరాజకీయాల వలన రాష్ట్ర ప్రగతి ఆగిపోతున్నదన్నది నిర్వివాదం. ఒక రాజకీయ పార్టీని నిలబెట్టటానికి ఎలాగైతే ఒకరికొకరు వెన్నకాస్తూ పార్టీ పెద్దల మాటను జవదాటకుండా ఉండాలన్నదానికి పార్టీ విప్ ని ఉపయోగిస్తూ లేదా పార్టీ అధిష్టానికి అనుకూలంగా ఉంటే పదవులు దక్కుతాయని ఆశిస్తూ ఉంటారో అలాగే పూర్వకాలం నుంచీ కులాలుగా చేసుకుని ఒక కులంలో ఉన్నవారు ఒకరికొకరు మద్దతునిచ్చుకుంటూ వారి సాంప్రదాయాలను కాపాడుకుంటూ రావటం ఆనవాయితీ అయిపోయింది. ఈ ఆనవాయితీ రావటానికి, ఒకే కులంలో వివాహాలు చేసుకోవటం బాగా దోహదం చేసింది. కులమనేది విస్తృతమైన పరిధైతే, అందులో బంధువర్గం ఇంకా సమీప పరిధి. అందువలన బంధువులకు, ఆ తర్వాత తన కులంవారికి చేయూతనిస్తూ వారి తప్పులను కాస్తూ మొత్తం కులం తరఫున ప్రతీవారూ వకాల్తా పుచ్చుకున్నట్టుగా మాట్లాడటం సాంప్రదాయంగా వస్తోంది.

ఈ సదుపాయాన్ని పార్టీ బలోపేతం చేసుకోవటానికి కూడా ఉపయోగించుకుంటున్నారు. తనవాడుంటే తన మాట వింటాడు అని ఆశపడుతూ తన కులంవారికే సాయపడటం, వారు తప్పులు చేసినా కొమ్ముకాయటం చెయ్యటమనేది వీళ్ళకి ఇన్సూరెన్స్ ప్రీమియం లాంటిది. వీరికి అవసరం పడ్డప్పడు మళ్ళీ వాళ్ళు ఆదుకుంటారని.

లోక్ సత్తా పార్టీ కార్యాలయంల గాంధీ విగ్రహానికి పూలమాల వేసి నివాళులర్పించిన జయప్రకాశ్ నారాయణ, అంబేద్కర్ ఇతర నాయకుల విగ్రహాల ధ్వంసం కేవలం రాజకీయ కుట్రనీ, కులాల మధ్య అంతరాన్ని పెంచటమే ధ్యేయంగా అవి జరుగుతున్నాయని, యువత ఆ వలయంలో పడవద్దని అన్నారు.

-శ్రీజ