Posted: 01/28/2012 06:44 PM IST

ఎన్నికలకోసం పెద్దపెద్ద సంస్థలను లంచాలు అడుగుతూ పట్టుబడ్డ ఉత్తర ప్రదేశ్ అభ్యర్థులకు ఎన్నికల కమిషన్ నోటీసులిచ్చింది. ఒక మీడియా ఛానెల్ 11 మంది అభ్యర్థుల లంచావతారాలను సీక్రెట్ కెమేరా ద్వారా రికార్డ్ చేసి వాళ్ళ ఛానెల్ లో చూపించింది. దీన్ని కాగ్నిజెన్స్ గా తీసుకున్న ఎన్నికల అధికారి, ఉత్తర ప్రదేశ్ ఛీఫ్ ఎలక్ట్రోరల్ ఆఫీసర్ కి వారందరి మీదా కేసులు నమోదు చెయ్యమని నోటీసులిచ్చారు.

ఎన్నికల ఖర్చులు కోట్లు దాటుతున్న ఈ కాలంలో ఒకపక్క ఎన్నికల కమిషన్ ఆంక్షలను తట్టుకుంటూనే చేసిన ఖర్చంతా చూపించకుండానే డబ్బు వరదలా ఖర్చుపెట్టటం ఒక ఎత్తైతే అంతకంటే ముందు ఆ డబ్బుని సమకూర్చుకోవటం మరింత కష్టమైన ఎత్తు. ఒకప్పుడు ఎన్నికలలో నిలబడే అభ్యర్థులకు కావలసిన మొత్తమంతా పార్టీ నుండి వచ్చేది. కానీ ఇప్పుడు ఖర్చు పెట్టే సామర్థ్యం ఉందని నిరూపిస్తేనే పార్టీ టికెట్ లభిస్తోంది. పార్టీ టికెట్ కోసం పార్టీ అధిష్టాన వర్గానికి డబ్బు ముట్టచెప్పాల్సివస్తోందని కూడా అక్కడక్కడా మరో ఆరోపణ. అందువలన పెద్ద పెద్ద సంస్థలనుంచి చందాలు తీసుకోవటం చాలా కాలంగా మొదలైంది. ఆ సంస్థలు మరి డబ్బెందుకిస్తాయి అంటే, ఈయన గారు గెలిస్తే ఆ సంస్థని ఉద్ధరిస్తారని నమ్మకం. ఏదో అనుమతులో మరేదో లబ్ధి చేకూరుతుందని ఈ చందాలు వాటికి పెట్టుబడిగా భావిస్తారు. అందుచేత ఇలాంటి వ్యవహారాలన్నీ లంచాలలోకి వస్తాయి, సెక్షన్ 171-బి కింద నేరం గా పరిగణించబడుతుంది. అయితే వీటికి ఇంత వరకూ సాక్ష్యాధారాలు పెద్దగా లభించలేదు. కానీ టెక్నాలజీ పెరగటంతో పారదర్శకత కొంతవరకూ, కొన్ని కోణాల్లో పెరుగుతోంది. దాని ఫలితమే పట్టుబడ్డ అభ్యర్థులు.

-శ్రీజ