Posted: 12/22/2011 04:10 PM IST

లోక్ పాల్ బిల్లు విషయంలో అసలు సమస్యలు ఇప్పుడు మొదలయ్యాయి.  ఇప్పటివరకూ ప్రవేశ పెట్టలేదనే అభియోగం ఒక్కటే ఉండేది.  ఇప్పుడు వివిధ పార్టీల నుంచి వచ్చే వివిధ రకాల అసంతృప్తిని అధిగమించటమనే అసలు సమస్య బిల్లు ప్రవేశపెట్టబట్టి ఇప్పుడెదురైంది.  అందులో మైనార్టీలను తీసివెయ్యటాన్ని లల్లూ ప్రసాద్ యాదవ్ తప్పు పట్టగా, గందరగోళం ఏర్పడి సభ వాయిదా పడింది.  ఈ లోపులో సమాజ్ వాది పార్టీ, జెడియు, ఆర్ జెడి పార్టీల కోరికను మన్నించి కేంద్ర ప్రభుత్వం మైనార్టీలకు స్థానమివ్వటానికి అంగీకరించగా మళ్ళీ సభ మొదలవగానే భాజపా దీనిపై అభ్యంతరాలు వ్యక్తపరచింది.  సుప్రీం కోర్టు ఆదేశాల ప్రకారం రిజర్వేషన్లు 50 శాతం మించరాదని భాజపా సీనియర్ నేత సుష్మా స్వరాజ్ గుర్తుచేసారు.  మధ్యాహ్నం 3.30 గంటలకు తిరిగి ప్రారంభమైన పార్లమెంటులో లోక్ పాల్ లోకాయుక్త బిల్లులను ప్రవేశపెట్టిన తర్వాత వాటిమీద సభలో చర్చలు మొదలయ్యాయి.  సుష్మాస్వరాజ్ చేసిన అభ్యంతరానికి స్పందిస్తూ, బిల్లులో మార్పులూ చేర్పులూ చేసే అవకాశం ఉందని, చర్చలు పూర్తయిన తర్వాత ఉభయ సభల్లోనూ సభ్యుల నుండి వచ్చే అభిప్రాయాలను పరిశీలిస్తామని ఆర్థిక మంత్రి ప్రణబ్ ముఖర్జీ అన్నారు. ఇది ఏమీ పటిష్టమైన బిల్లు కాదని, ఎవరో నలుగురైదుగురు కలిసి పార్లమెంటునీ ప్రభుత్వాన్నీ శాసించటం తగదని లల్లూ ప్రసాద్ యాదవ్ అభిప్రాయపడ్డారు.  అందువలన ప్రధానమంత్రిని, కింది స్థాయి అధికారులను లోక్ పాల్ బిల్లు పరిధిలోకి తీసుకుని రాకూడదని ాయన అన్నారు. 

-శ్రీజ