Posted: 11/26/2011 04:42 PM IST

బెంగాల్ లో పోలీస్ ఎన్ కౌంటర్ లో మరణించిన కరీం నగర్ జిల్లా పెద్దపల్లి వాస్తవ్యుడు కిషన్ జీ అంత్యక్రియలను కవర్ చెయ్యటానికి అక్కడకు చేరుకున్న పశ్చిమ బెంగాల్ పత్రిక ఆనంద్ బజార్ పత్రికా ప్రతినిదులను పోలీసులు అరెస్ట్ చేసారు. పత్రికా ప్రతినిధులు సునంద్ ఘోష్, మహేష్, వారి డ్రైవర్ ని కూడా అదుపులోకి తీసుకున్న పోలీసులు వారి ఐడి కార్డ్ లను చూసి కూడా వారిని విడిచిపెట్టలేదు. పెద్దపల్లి లో ఈరోజు వ్యాపార సంస్థలు, విద్యా సంస్థలు స్వచ్ఛందంగా మూసివేసారు. కిషన్ జీ అంతిమ దర్శనం కోసం అక్కడ అందరూ ఆత్రుతగా ఎదురు చూస్తున్నారు.

పశ్చిమ బెంగాల్ లో మిడ్నపూర్ మెడికల్ కిషన్ జీ మృత దేహానికి పోస్ట్ మార్టం జరిగిన తర్వాత దేహాన్ని అతని బంధువులకు అప్పగించారు. మృత దేహాన్ని తామే తరలించగలమని, అందుకు ప్రభుత్వ సాయం అవసరం లేదని వరవరరావు అన్నారు. పోలీసుల భూటకపు ఎన్కౌంటర్ మీద నినాదాలు చేసిన వరవరరావు ఆయన అనుచరులను స్థానికులు తప్పు పట్టారు. కిషన్ జీ వలన ఎంత ప్రాణ నష్టం జరిగిందో తెలుసా అని వారంతా అడిగారు.

22000 మంది సాయుధ బలగాలకు కిషన్ జీని పట్టుకునే పని అప్పగించారని సమాచారం. 2009 నుండి దాదాపూ 18 నెలలు గాలించి చివరకు కిషన్ జీ ఎన్ కౌంటర్ తో మావోయిస్ట్ చర్యలు సాగించే సంస్థ నడుం విరిగినట్లయిందని, దీనితో పశ్చిమ బెంగాల్ లోనే కాక ఒరిస్సా, చత్తీస్ గఢ్ లో కూడా మావోయిస్ట్ ల బలం తగ్గిపోయిందని పోలీసు బలగాలు భావిస్తున్నాయి.

అయితే, పార్టీకి ఇది తీరని నష్టమైనా, కిషన్ జీ ఎందరో నేతలను తనలా తయారు చేసారని, విప్లవం ఆగే ప్రసక్తే లేదని వరవర రావు స్పష్టం చేసారు. అయితే ప్రతీకారం తమ లక్ష్యం కాదని, ప్రతిఘటనే విప్లవ లక్ష్యమని వివరించారు.

-శ్రీజ