నోరూరించే చికెన్ గారెల తయారీ...

Posted: 11/05/2015 06:57 PM IST

మాంసాహారప్రియులు ఎంతో ఇష్టంగా తీసుకునే చికెన్ తో ఎన్నోరకాల వంటకాలు చేసుకోవచ్చు. ముఖ్యంగా వీకెండ్ సమయాల్లో డిఫరెంట్ ఫుడ్స్ తీసుకోవడానికి ప్రతిఒక్కరు ఇష్టపడతారు. ఇక చికెన్ తో తయారుచేసే వివిధ వంటకాల్లో చికెన్ గారెలు కూడా ఒకటి. ఇవి ఎంతో రుచికరంగా వుండటమే కాకుండా ఆరోగ్యానికి మంచివి కూడా.పైగా.. వీటిని తయారుచేయడం కూడా చాలా సులభమే.. మరి ఎలా చేస్తారో తెలుసుకుందామా..

కావలసిన పదార్థాలు :
బోన్‌లెస్ చికెన్ - అర కేజీ
శనగపప్పు - నాలుగు కప్పులు
గరం మసాలా - నాలుగు టీ స్పూన్లు
పసుపు - చిటికెడు
కొత్తిమీర తరుగు - అర కప్పు,
కారం - ఒక టీ స్పూన్
అల్లం వెల్లుల్లి పేస్ట్ - రెండు టీ స్పూన్లు
పచ్చి మిర్చి తరుగు - రెండు టీ స్పూన్లు
ఉల్లి తరుగు - అర కప్పు
నూనె, ఉప్పు -  తగినంత

తయారీ విధానం:
* ముందుగా శనగప్పును నానబెట్టుకుని.. గారెలకు తగినట్లు రుబ్బుకోవాలి. మరోవైపు చికెన్ శుభ్రం చేసుకుని పక్కన పెట్టుకోవాలి.
* అనంతరం శుభ్రం చేసుకున్న చికెన్ ముక్కలకు కారం, గరం మసాలా, అల్లం వెల్లుల్లి పేస్ట్, ఉప్పు, పసుపు తదితరాలు చేర్చి, తగినన్ని నీళ్లు పోసి ఉడికించుకోవాలి.
* రుబ్బుకున్న శనగపప్పు ముద్దకు ఉల్లి, పచ్చిమిర్చి, ఉడికించిన చికెన్, మసాలా కాసింత ఉప్పు వేసి కలుపుకోవాలి.
* ఈ గారెల మిశ్రమాన్ని వేడైన నూనెలో దోరగా వేపుకుంటే సరిపోతుంది. అంతే! చికెన్ గారెలు రెడీ అయినట్టే.