బియ్యపు పిండితో వేడివేడి వడలు..

Posted: 09/08/2015 06:15 PM IST

బియ్యపు పిండితో తయారయ్యే వేడివేడి వడలు కేరళలో ఎంతో స్పెషల్ రెసిపీ. ఇవి కూడా సాధారణ గారెలలాగే వుంటాయి కానీ.. మరింత క్రిస్పీగా, టేస్టీగా వుంటాయి. ఈ వడలతో ఆరోగ్య ప్రయోజనం కూడా వుంది. అదేమిటంటే.. ఈ వడల్ని రెగ్యులర్ గా తీసుకుంటే శరీర బరువును నియంత్రించుకోవచ్చు. ఎందుకంటే.. ఈ వడల్లో ఆరోగ్యకరమైన పోషకాలతోపాటు బరువును తగ్గించే క్యాలరీలు వుంటాయి. కాబట్టి.. వీటిని నిత్యం తీసుకుంటే ఎంతో శ్రేయస్కరం. మరి.. వీటిని ఎలా తయారుచేస్తారో తెలుసుకుందామా...

కావలసిన పదార్థాలు :
బియ్యం పిండి : ఒక కప్పు
కొబ్బరి తురుము : ఒక కప్పు
పచ్చిమిర్చి : పావు స్పూన్
ఉల్లి తరుగు : అర కప్పు
కొబ్బరి నూనె : తగినంత
ఉప్పు : తగినంత

తయారీ విధానం :
* ముందుగా కొద్దిపాటి బియ్యం తీసుకుని బాగా వేయించాలి. అనంతరం పౌడర్ గా చేసుకుని పక్కన పెట్టుకోవాలి.
* మరోవైపు కొబ్బరి తురుము, పచ్చిమిర్చి, ఉల్లి తదితరాలను మిక్సీలో వేసి మెత్తని పేస్టులా అయ్యేవరకు రుబ్బుకోవాలి.
* ఇప్పుడు ఈ మిశ్రమాన్ని బియ్యం పిండిలో చేర్చి.. గారెలకు వీలుగా పిండిని నీటితో కలిపి సిద్ధం చేసుకోవాలి.
* అందులో కొద్దిగా ఉప్పు చేర్చి.. గారెల్లా నూనెలో వేపి తీసుకోవాలి. దోరగా వేగాక బయటకు తీసేయాలి. అంతే!