గుణ 369 టీజర్ రిలీజ్.. ఆకట్టుకుంటున్న కార్తీకేయ..

Posted: 06/17/2019 09:37 PM IST

Guna 369 teaser has bland and dated feel to it

‘ఆర్‌‌ఎక్స్ 100’ సినిమాతో వెండితెరకు పరిచయమైన కార్తికేయ గుమ్మకొండ తొలి సినిమాతోనే మంచి గుర్తింపు తెచ్చుకున్నారు. ఈ సినిమా బ్లాక్ బస్టర్ హిట్ కావడంతో కార్తికేయకు డిమాండ్ పెరిగింది. వరసపెట్టి సినిమాలను అంగీకరించారు. ఇటీవలే ‘హిప్పీ’ సినిమా వచ్చింది. అయితే, ఈ సినిమా ప్రేక్షకులను ఆకట్టుకోవడంలో విఫలమైంది. ఇప్పుడు ‘గుణ 369’ అనే యాక్షన్ ఎంటర్‌టైనర్‌తో కార్తికేయ ప్రేక్షకుల ముందుకు వస్తున్నారు.

‘గుణ 369’ కార్తికేయకు మూడో సినిమా. అర్జున్ జంధ్యాల ఈ చిత్రంతో దర్శకుడిగా పరిచయమవుతున్నారు. స్ప్రింట్ ఫిల్మ్స్, జ్ఞాపిక ఎంటర్‌టైన్మెంట్స్ పతాకాలపై అనిల్ కడియాల, తిరుమల్ రెడ్డి నిర్మిస్తున్నారు. చైతన్ భరద్వాజ్ సంగీతం సమకూరుస్తున్నారు. ఈ సినిమా ద్వారా అనఘ హీరోయిన్‌గా తెలుగు తెరకు పరిచయం అవుతున్నారు. ఇటీవలే ఈ చిత్ర ఫస్ట్ లుక్ విడుదలైంది. సంప్రదాయ చొక్కా, లుంగీలో కార్తికేయ లుక్ అదిరిపోయిందంటూ అంతా కితాబిచ్చారు. ఇప్పుడు ఈ చిత్ర టీజర్‌ను విడుదల చేశారు.

టీజర్ చూస్తుంటే కార్తికేయకు ఇది మంచి కమర్షియల్ సినిమా అవుతుందని అర్థమవుతోంది. టీజర్‌లో కార్తికేయ అమ్మాయి చుట్టూ తిరిగే ప్రేమికుడిగా, అన్యాయాన్ని ఎదిరించే కుర్రాడిగా కనిపించారు. ప్రేమికుడిగా చాలా సాఫ్ట్‌గా డైలాగులు చెప్పిన కార్తికేయ.. ఎమోషనల్ సీన్‌లో బేస్ వాయిస్‌తో అదరగొట్టారు. ‘మనం చేసే తప్పుల వల్ల మన జీవితానికి ఏం జరిగినా పర్వాలేదు. కానీ, పక్కనోడి జీవితానికి ఏ హాని జరగకూడదు’ అనే సాయి కుమార్ వాయిస్ ఓవర్‌తో టీజర్ మొదలైంది.

‘మా లాంటి వాళ్లు మీలాంటి వాళ్లను చూసి భయపడేది, గొడవలంటే మూసుకుని కూర్చునేది మాకేదైనా అవుతుందని కాదు.. మా అనుకున్నవాళ్లకు ఏదైనా అవుతుందన్న చిన్న భయంతో’ అంటూ కార్తికేయ చెప్పే పవర్‌ఫుల్ డైలాగ్ టీజర్‌కే హైలైట్. మొత్తం మీద కార్తికేయ కొత్త అవతారం ఎత్తారు. ఈసారి పక్కా కమర్షియల్ యాక్షన్ డ్రామాను ఎంపిక చేసుకున్నారు. చూద్దాం రేపు థియేటర్లలో ‘గుణ 369’ ఏ మేర ఆకట్టుకుంటుందో!